Rahul Gandhi : दिल्लीतील रामलीला मैदानावर १ नोव्हेंबर रोजी होणारी इंडिया आघाडीची रॅली १० नोव्हेंबरनंतर आयोजित करावी. दिवाळीच्या मुख्य खरेदीच्या हंगामात या रॅलीमुळे १० हजार कोटी रुपयांच्या व्यापाराचे नुकसान होण्याची शक्यता आहे, असे प्रतिपादन चेंबर ऑफ ट्रेड अँड इंडस्ट्रीजचे (सीटीआय) अध्यक्ष ब्रिजेश गोयल यांनी केले आहे. यासंदर्भात त्यांनी लोकसभेतील विरोधी पक्षनेते राहुल गांधी यांना विनंती केली आहे.

सीटीआयचे अध्यक्ष गोयल म्हणाले की, रामलीला मैदानालगतच्या घाऊक आणि किरकोळ बाजारपेठांवर या रॅलीचा विपरीत परिणाम होऊ शकतो. सध्या धनत्रयोदशी आणि दिवाळीच्या निमित्ताने व्यापारी मोठ्या ग्राहकसंख्येची अपेक्षा करत आहेत. धनत्रयोदशी यंदा ६ नोव्हेंबरला आहे.

या काळात दिल्लीत सोने-चांदी, इलेक्ट्रॉनिक्स, कपडे, भांडी, सुका मेवा, मिठाई, वाहने, मालमत्ता आणि भेटवस्तू अशा विविध क्षेत्रांत सुमारे २५ हजार कोटी रुपयांचा व्यवसाय होतो. त्यानंतर ८ नोव्हेंबरला दिवाळी आणि १० नोव्हेंबरला भाऊबीज साजरी केली जाणार आहे.

सणासुदीच्या काळात साधारणपणे एक आठवडा आधी बाजारपेठांमध्ये मोठी वर्दळ असते. अशा वेळी रॅलीचे आयोजन केल्यामुळे व्यापाऱ्यांमध्ये चिंतेचे वातावरण निर्माण झाले आहे. अशात एक नोव्हेंबरला रविवार असल्याने या काळात ग्राहकांचा सर्वाधिक ओघ असतो.

आधीच सुमारे ३ हजार कोटी रुपयांचे नुकसान

सीटीआयच्या अंदाजानुसार, ऑक्टोबर महिन्यात कनॉट प्लेस, इंडिया गेट आणि मध्य दिल्ली परिसरात झालेल्या विविध रॅली, मोर्चे आणि रस्ते बंद करण्याच्या प्रकारांमुळे दिल्लीतील व्यापाऱ्यांचे आधीच सुमारे ३ हजार कोटी रुपयांचे नुकसान झाले आहे.

या अडथळ्यांमुळे घाऊक बाजारपेठांमध्ये मालाची ने-आण करण्यावर परिणाम झाला असून, किरकोळ दुकानांमध्ये येणाऱ्या ग्राहकांच्या संख्येतही घट झाली आहे. म्हणून रामलीला मैदानापासून पाच किलोमीटरच्या परिघात असलेल्या सुमारे २० घाऊक आणि किरकोळ बाजारपेठांकडे दुर्लक्ष होऊ नये.

यामध्ये चांदनी चौक, सदर बाजार, चावडी बाजार, भागीरथ पॅलेस, खारी बावली, काश्मीरी गेट, नई सडक, मोरी गेट, किनारी बाजार, दरीबा, दरियागंज, अजमेरी गेट, जामा मशीद, करोल बाग आणि आझाद मार्केट यांचा समावेश आहे.

नेमक्या अडचणी कोणत्या? 
१. या बाजारपेठांमधून देशभर मालपुरवठा होतो.
२. रॅलीदरम्यान वाहतुकीत केलेले बदल त्रासदायक ठरतात.
३. बॅरिकेड्स लावणे आणि वाहतुकीवरच्या निर्बंधांमुळे व्यवसाय होत नाही.
४. इतर राज्यांतून दिल्लीत येणाऱ्या व्यापा-यांची गैरसोय होते.
५. रस्त्यांवरील निर्बंध आणि प्रचंड गर्दीचा व्यवसायावर विपरीत परिणाम होतो.

Solapur News: पुढील नऊ महिने जिल्ह्यातील नागरिकांना पाणी उपलब्ध राहण्यासाठी काटेकोर नियोजन करा – जिल्हाधिकारी एस. कार्तिकेयन.