Pune Crime: पुणे येथील स्वारगेट आगारात बसमध्ये 26 वर्षीय तरूणीवर झालेल्या कथित लैंगिक अत्याचाराच्या तपासादरम्यान, फरार आरोपींना कठोर शिक्षा व्हावी, अशी मागणी जोर धरू लागली आहे. भारताचे माजी सरन्यायाधीश डीवाय चंद्रचूड यांनीही अशीच मागणी केली आहे. 2012 च्या दिल्ली निर्भया सामूहिक लैंगिक अत्याचाराशी या घटनेची तुलना करणाऱ्या विरोधकांच्या वाढत्या दबावादरम्यान, हे प्रकरण सोडवण्यासाठी जोरदार प्रयत्न सुरू आहेत. फरार आरोपींची माहिती देणाऱ्याला पोलिसांनी एक लाख रुपयांचे बक्षीस जाहीर केले आहे.

महाराष्ट्र राज्य मार्ग परिवहन महामंडळाच्या (एमएसआरटीसी) बसमध्ये पुणे स्वारगेट आगारात मंगळवारी सकाळी घडलेल्या घटनेनंतर फरार असलेला आरोपी दत्तात्रेय रामदास गाडे (37) याला पकडण्यासाठी पोलिसांनी अनेक पथके तयार केली आहेत. माजी सरन्यायाधीश डीवाय चंद्रचूड यांनी गुरुवारी सांगितले की, ‘निर्भया’ घटनेनंतर कायद्यांमध्ये बरेच बदल करण्यात आले, मात्र केवळ कायदे करून अशा घटना थांबवता येणार नाहीत. समाजावर मोठी जबाबदारी असून त्याशिवाय कायद्यांची कडक अंमलबजावणी झाली पाहिजे.

महिलांसाठी केलेल्या कायद्यांची योग्य अंमलबजावणी झाली पाहिजे, असे चंद्रचूड म्हणाले. महिला जिथे जातील तिथे सुरक्षित वाटले पाहिजे. अशा प्रकरणांमध्ये योग्य तपास, कठोर कारवाई, जलद सुनावणी आणि शिक्षा होणे आवश्यक आहे. कायदा आणि सुव्यवस्था आणि पोलिसांवर मोठी जबाबदारी आहे. दरम्यान, आरोपी अद्याप फरार असून त्याला सोडले जाणार नसल्याचे उपमुख्यमंत्री एकनाथ शिंदे यांनी सांगितले आहे.

आरोपी सापडेना, शोधमोहीम थांबवली –

आरोपी दत्तात्रय गाडे पुणे जिल्ह्यातल्या शिरूर तालुक्यातील गुनाट गावचा रहिवाशी असून पोलिसांना या आरोपीसंदर्भात मोठी माहिती हाती लागली होती. आरोपी काल रात्री पुण्यातील गुनाट गावात आल्याची माहिती समोर आली. गुनाट गावातील घरात आरोपी दत्तात्रय गाडेने पाणी मागितले, अशी माहिती पुण्यातील शिरूर येथील गुनाट गावातील गावकऱ्यांनी दिली. गुनाट गावातील गावकऱ्यांकडून मिळालेल्या या माहितीनंतर पोलिसांकडून गुनाट गावात आरोपीचा कसून शोध घेण्याची मोहीम सुरू झाली. पोलिसांचा फौजफाटा गुनाट गावात दाखल झाला. गावात असणाऱ्या ऊसाच्या शेतामध्ये ड्रोन आणि डॉग स्कॉडच्या मदतीने आरोपीचा घेण्यात आला. मात्र दिवसभर पोलिसांनी सर्व परिसर पालथा घातला मात्र आरोपीचा शोध लागला नाही.

दरम्यान, गुनाट गावातील आरोपी दत्ता गाडेला शोधण्याची आजच्या दिवसाची शोध मोहीम थांबविण्यात आली आहे. उद्या सकाळपासून पुन्हा शोध मोहिमेला सुरुवात होणार आहे. पुणे पोलिसांनी ग्रामस्थांना देखील रात्रीच्या वेळी आरोपी दिसला तर कळवण्याचे आहवान केले आहे.

25 एकर परिसरात केली पाहणी –

दत्ता गाडेला शोधण्यासाठी गेलेल्या पोलिसांनी गुनाट गावच्या परिसरातील गाडे ज्या शेतात असल्याची माहिती मिळाली होती तेथील 25 एकर परिसरातील शेतशिवाराची पहाणी केली. मात्र तरीही दत्ता गाडेचा शोध लागला नसल्याने शोध पथकाला परत येण्याच्या सुचना देण्यात आले आहे. परिसरात बिबट्याचा वावर असल्याने भीतीचे वातावरण आहे. त्यामुळे रात्रीची शोधमोहिम थांबविण्य़ात आली आहे.

दत्तात्रय गाडेवर 1 लाखाचे बक्षीस –
फरार आरोपी दत्तात्रय गाडेला पकडण्यासाठी पोलिसांनी 1 लाख रुपयांचे बक्षीस जाहीर केले आहे. नागरिकांनी कुठल्याही संशयित हालचाली आढळल्यास स्वारगेट पोलिस ठाण्याशी किंवा 100 क्रमांकावर संपर्क साधावा, अशा सूचनाही देण्यात आली आहे. आरोपीबद्दल माहिती सांगणाऱ्याचे नाव गुप्त ठेवले जाईल, असेही पोलिसांकडून सांगण्यात आले आहे. आरोपीचा शोध घेण्यासाठी विविध ठिकाणी छापे टाकण्यात येत असून, लवकरच त्याला अटक केली जाईल, असा विश्वास पोलिसांनी व्यक्त केला आहे.