HSRP number plate : एप्रिल २०१९ पूर्वीच्या सर्व नोंदणीकृत वाहनांना HSRP नंबर प्लेट बसवणे बंधनकारक आहे. ही भारतातील वाहनांसाठी अनिवार्य असलेली नंबर प्लेट आहे, जी बनावट टाळण्यासाठी आणि सुरक्षिततेसाठी डिझाइन केलेली आहे. मोटर वाहन कायदा, १९८८ अंतर्गत परिवहन मंत्रालयाने लागू केली आहे. आता HSRP नंबर प्लेट बाबत महत्वाची बातमी समोर आली आहे.

ही नंबर प्लेट बसविण्यासाठीचा अर्ज करण्याचा वेग पुन्हा कमी झाला आहे. त्यामुळे आता उच्च सुरक्षा नंबरप्लेट बसविण्याची मुदत वाढण्याची शक्यता आहे. पुण्यात २० लाख वाहनांना ही नंबरप्लेट बसविणे बाकी आहे. शहरात आत्तापर्यंत ७ लाख ३७ हजार २१९ वाहनांनी उच्च सुरक्षा नंबरप्लेटसाठी अर्ज केले आहे. त्यापैकी पाच लाख १९ हजार वाहनांना नंबरप्लेट बसविण्यात आली असल्याची माहिती मिळत आहे.

गेल्या सहा महिन्यांपासून उच्च सुरक्षा नंबरप्लेट वाहनांना बसविण्याचे काम सुरू आहे. सुरुवातीला फिटमेंट सेंटरची संख्या कमी होती. पण त्यानंतर काही प्रमाणात संख्या वाढविण्यात आली आहे, मात्र तरीही अजूनही वाहनधारकांकडून सुरक्षा प्लेट लावण्यासाठी दुर्लक्ष होत असल्याचे समोर आलं आहे. न्यायालयाच्या आदेशानुसार परिवहन विभागाने एप्रिल २०१९ पूर्वीच्या सर्व वाहनांना उच्च सुरक्षा नंबरप्लेट बसविणे बंधनकारक केले आहे.

मात्र, पुणे शहरातील फिटमेंट सेंटरची संख्या कमी असून, ती वाढविणे गरजेचे असल्याचं बोललं जात आहे. सध्या शहरात फिटमेंट सेंटरची संख्या ही २०६ इतकीच आहे. पुणे प्रादेशिक परिवहन विभाग अर्थात आरटीओने रोझमाटो या कंपनीच्या अधिकाऱ्यांना फिटमेंट सेंटर वाढविण्याच्या सूचना दिल्या आहेत. त्यामुळे फिटमेंट सेंटरची संख्या वाढण्याची शक्यता आहे.

हेही वाचा : नागपूरच्या कोराडी येथील महालक्ष्मी मंदिर परिसरात दुर्घटना; स्लॅब कोसळल्याने अनेक जण जखमी