Pune ZP Election – आगामी जिल्हा परिषद व पंचायत समिती निवडणुकांच्या पार्श्वभूमीवर हवेली तालुका निवडणूक कार्यालयात संगणक, एसएमएस मॉनिटरिंग व कम्युनिकेशनसाठी अत्याधुनिक आयटी सेल प्रभावीपणे कार्यान्वित करण्यात आला आहे. निवडणूक प्रक्रिया अधिक पारदर्शक, सुलभ आणि तंत्रज्ञानस्नेही करण्याच्या उद्देशाने या कक्षामार्फत विविध महत्त्वाची कामे राबवली जात असल्याची माहिती हवेलीचे उपविभागीय अधिकारी तथा निवडणूक निर्णय अधिकारी डॉ. यशवंत माने यांनी दिली.आयटी सेलमध्ये शुभम वाबळे, अभिषेक धुमाळ, अक्षय ओव्हाळ, गणेश शिसोदे, मयूर शेवाळे, विनायक शिंदे आणि वैभव मोटे यांचा समावेश असून, सर्वजण निवडणूक प्रक्रियेसाठी तांत्रिक समन्वय साधण्याचे काम करीत आहेत. आयटी सेलमार्फत जिल्हा निवडणूक अधिकारी तसेच राज्य निवडणूक आयोगाच्या संकेतस्थळांचे नियमित अद्ययावतीकरण केले जात आहे. त्याचबरोबर स्थानिक निवडणूकविषयक बातम्या, छायाचित्रे व आवश्यक माहिती वेळेत अपलोड केली जात आहे. राज्य निवडणूक आयोगाने निश्चित केलेल्या विविध निवडणूक अॅप्लिकेशन्सची अंमलबजावणी करून त्यांचा वापर सुलभ व्हावा, यासाठी संबंधित अधिकारी व कर्मचार्यांना प्रशिक्षणही देण्यात येत आहे.निवडणूक प्रक्रियेसाठी आवश्यक संगणक, इंटरनेट सुविधा, सॉफ्टवेअर तसेच अन्य तांत्रिक साहित्य उपलब्ध करून देण्याचे काम आयटी सेलकडून करण्यात येत आहे. मतदान केंद्रांवर वेबकास्टिंगसाठी केंद्रांची यादी निश्चित करणे, आवश्यक तांत्रिक नियोजन करणे तसेच मतदानाच्या दिवशी थेट मॉनिटरिंगसाठी स्वतंत्र स्क्रीन, टीव्ही व इंटरक्टिव्ह पॅनलची व्यवस्था करण्यात आली आहे.प्री-पोल डे व पोल डे दरम्यान मॉनिटरिंग, कम्युनिकेशन व रिपोर्टिंगसाठी मोबाईल व वेब-आधारित अॅप्सचा वापर करण्यात येत आहे. तसेच ईव्हीएम, कायदा व सुव्यवस्था विषयक माहिती संकलन व अहवाल सादर करण्याचे काम सुरू आहे. ईव्हीएम स्ट्राँगरूम व मतमोजणी केंद्रांवर सीसीटीव्ही, व्हिडिओग्राफी व फोटोग्राफीची व्यवस्था करून रेकॉर्डिंग व बॅकअप सुरक्षितपणे जतन करण्यात येत आहे. याशिवाय स्वतंत्र कम्युनिकेशन रूम स्थापन करून संपर्क व्यवस्था अधिक सक्षम करण्यात आली असून, मतदार यादी, मतदार नाव शोध सर्च इंजिन तसेच निवडणूकविषयक सर्व सॉफ्टवेअरचे व्यवस्थापन आयटी सेलमार्फत केले जात आहे. त्यामुळे हवेली तालुक्यातील निवडणूक प्रक्रिया अधिक पारदर्शक, विश्वासार्ह आणि तंत्रज्ञानाधारित ठरण्यास मदत होत आहे.
