Pune ZP Election 2026 – आगामी जिल्हा परिषद निवडणुकीसाठी तळेगाव ढमढेरे-रांजणगाव सांडस गटात राजकीय रणधुमाळी उडाली असून, हा गट आता चौरंगी लढतीकडे झुकला आहे. भाजप, राष्ट्रवादी काँग्रेस, दोन्ही शिवसेनेना आणि प्रबळ अपक्ष उमेदवारांनी शड्डू ठोकल्याने मतदारांमध्ये कमालीची उत्सुकता निर्माण झाली आहे. शेवटच्या क्षणी सारिका राहुल कर्पे यांनी धनुष्यबाण हाती घेतल्याने आणि भाजपच्या तालुकाध्यक्षांच्या पत्नीने अपक्ष अर्ज भरल्याने प्रस्थापितांसमोर मोठी आव्हाने उभी राहिली आहेत.

चौरंगी रणभूमी: कोण लढणार कोणाशी?
१) भारतीय जनता पक्ष – दिपाली राहुल गव्हाणे
२) नॅशनलिस्ट काँग्रेस पार्टी – रेखा बांदल
३) शिवसेना – सारिका राहुल कर्पे
४) शिवसेना (ठाकरे) – चेतना जयकुमार ढमढेरे
५) अपक्ष उमेदवार – रेश्मा जयेश शिंदे

अपक्ष उमेदवारांची भूमिका
भाजपाचे तालुकाध्यक्ष जयेश शिंदे यांनी सांगितले की, चार वर्षांच्या तयारीनंतर पक्षाने त्यांच्या पत्नीची उमेदवारी नाकारली, त्यामुळे त्यांनी अपक्ष उमेदवारी अर्ज सादर करण्याचा निर्णय घेतला. त्यामुळे रेश्मा जयेश शिंदे या अपक्ष उमेदवार म्हणून लढतील आणि मतदारांमध्ये नव्याने चर्चेचा विषय निर्माण करतील. राजकीय विश्लेषकांच्या मते, अपक्ष उमेदवाराच्या या उत्थानामुळे पारंपरिक पक्षांसाठी गट जास्त सोपा ठरणार नाही.

मागील निवडणुकीचा संदर्भ
या गटात मागील निवडणुकांमध्ये राजकीय वर्चस्व राखण्यासाठी पक्षांनी अनेकदा रणनीतिक बदल आणि उमेदवार फेरफार केले आहेत. गेल्या चार वर्षात पक्षांनी स्थानिक विकास उपक्रमांवर भर दिला, मात्र अखेरच्या क्षणी उमेदवार बदल, अपक्ष उमेदवारी आणि धनुष्यबाण हाती घेणे या घटनांनी स्थानिक मतदारांमध्ये मतांची दिशा बदलण्याची शक्यता निर्माण केली आहे.

अर्ज माघारी उत्सुकता
अर्ज दाखल करण्याच्या शेवटच्या दिवशी घडलेल्या या राजकीय उलथापालथांनी निवडणूक गटात उत्कंठा आणि थरार निर्माण केला आहे. आता मतदारांसमोर कुणाची रणनीती जिंकणार आणि राजकीय ताकद कोणाच्या बाजूला येईल, हे पाहणे उत्सुकतेचे ठरणार आहे.

तळेगाव ढमढेरे पंचायत समिती गणातही बहुरंगी सामना
या गणात नॅशनॅलिस्ट काँग्रेस पक्षाच्या शोभा महेश ढमढेरे, शिवसेनेच्या चेतना जयकुमार ढमढेरे, अपक्ष विद्या रमेश भुजबळ, भाजपच्या विद्या राजेंद्र भुजबळ आणि अपक्ष भुजबळ शारदा वसंत यांच्यात थेट सामना होणार आहे. घराघरांत प्रचाराची धग वाढताना दिसत आहे.

रांजणगाव सांडस गणात अपक्षांचा प्रभाव
रांजणगाव सांडस पंचायत समिती गणात एकूण दहा उमेदवार रिंगणात असून अपक्षांची संख्या लक्षणीय आहे. अपक्ष राजेंद्र बाबासो पवार, राहुल शंकर कर्पे, बबन बापू काळे, निलेश हरिदास रणदिवे, राजाराम दत्तात्रय जाधव, नामदेव जयवंत गिरमकर यांच्यासह भाजपचे काळे हनुमंत बापू, राष्ट्रवादी काँग्रेस पार्टीचे रणसिंग विजय सोमनाथ, शिवसेना (उद्धव बाळासाहेब ठाकरे) चे नितीन कैलास रणदिवे आणि शिवसेनेचे(शिंदे गट) राहुल राजाराम रणदिवे अशी ही लढत आहे.