BJP Politics :  राज्यात विधान परिषदेच्या पदवीधर आणि शिक्षक मतदारसंघांच्या निवडणुकांची धामधूम सुरू असतानाच भाजपमध्ये महत्त्वाची घडामोड घडली आहे. भाजपचे माजी आमदार गिरीश व्यास यांनी पक्षाच्या प्राथमिक सदस्यत्वासह सर्व पदांचा राजीनामा दिला आहे. तसेच नागपूर पदवीधर मतदारसंघातील भाजपचे बंडखोर उमेदवार अनिल सोले यांना त्यांनी पाठिंबा जाहीर केला आहे.

राज्यात विधान परिषदेच्या पाच जागांसाठी निवडणूक प्रक्रिया सुरू आहे. उमेदवारी अर्ज मागे घेण्याच्या शेवटच्या दिवशी विविध मतदारसंघांत बंडखोरीचे चित्र पाहायला मिळाले. याच पार्श्वभूमीवर गिरीश व्यास यांच्या निर्णयामुळे नागपूरमधील राजकीय घडामोडींना वेग आला आहे.

गिरीश व्यास यांनी सांगितले की, अनिल सोले यांना आपण शब्द दिला होता. तो पाळण्यासाठी राजीनामा देऊन आपले कार्यालयही त्यांच्यासाठी उपलब्ध करून दिले आहे. सध्या अनिल सोले यांचे मुख्य प्रचार कार्यालय व्यास यांच्या महाल परिसरातील कार्यालयात सुरू करण्यात येत आहे.

पक्षाकडून शिस्तभंगाची कारवाई होण्याची शक्यता लक्षात घेऊन आपण स्वतःहून प्राथमिक सदस्यत्वाचा राजीनामा दिल्याचेही व्यास यांनी स्पष्ट केले. या निर्णयात आपल्याला काही वेगळे वाटत नसल्याचे त्यांनी सांगितले.

अनिल सोले हेही भाजपचे निष्ठावंत असल्याचा दावा व्यास यांनी केला. ते निवडून येतील आणि भाजपसोबतच सहकारी म्हणून काम करत राहतील, असा विश्वास त्यांनी व्यक्त केला. आपण अनिल सोले यांना पूर्ण पाठिंबा देत असून, पक्षाच्या चौकटीत राहूनच काम करत असल्याचेही त्यांनी म्हटले.

भाजपमध्ये अंतर्गत लोकशाही असल्याने उमेदवारी अर्ज भरण्यात आला, असे व्यास यांनी सांगितले. पक्षाला याची माहिती असून, त्यातून अप्रत्यक्ष अनुमती मिळाल्याचे आपल्याला वाटते, असेही त्यांनी स्पष्ट केले.