Pune Waste Management – उरुळी कचरा डेपोतील महापालिकेच्या सुरू असलेल्या ओपन डंपिंग तसेच इतर प्रक्रिया प्रकल्पांच्या समस्यांबाबत उरुळी देवाची आणि फुरसुंगी ग्रामस्थांच्या वतीने कचरा डेपोच्या परिसरात आंदोलन सुरू केले आहे. परिणामी, मागील सहा ते सात दिवसांपासून शहरातील कचरा व्यवस्थापन कोलमडले असून, अनेक भागांतील कचरा तसाच रस्त्यावर पडून आहे.

तर प्रशासनाने काही कचरा हस्तांतरण रॅम्प तसेच वाहनांमध्ये साठवून ठेवला आहे. मात्र, या वाहनांची क्षमताही संपली असून, शहरात जवळपास ५ ते ६ हजार टन कचरा पडून आहे. तर, प्रशासनाकडून या आंदोलनावर तोडगा काढण्यासह, इतर प्रकल्पांची क्षमता वाढविण्यासाठी प्रयत्न सुरू असले तरी, पावसामुळे हा कचरा कुजत असून, अनेक भागात दुर्गंधी पसरण्यास सुरुवात झाली असल्याने नागरिकांच्या आरोग्याचा गंभीर प्रश्न निर्माण झाला आहे.

५ हजार टन कचरा पडून
शहरात दरारोज सुमारे २८०० टन कचरा निर्माण होतो. यात समाविष्ट गावातील कचऱ्याचाही समावेश आहे. मात्र, यातील बहुतांश कचरा उरुळी येथील प्रक्रिया प्रकल्पात पाठविला जातो. या ठिकाणी जाणारा रोजचा ५०० ते ६०० टन कचरा गेल्या आठ ते दहा दिवसांपासून प्रकल्पावर पाठविताच आलेला नसल्याने शहरात जागा मिळेल तिथे तो संकलन सुरू आहे.

तर दुसरीकडे शहरातील कचरा प्रक्रियेचे वेगवेगळे २७ प्रकल्प सुरू असले तरी त्या प्रत्येक ठिकाणी ते पूर्ण क्षमतेने सुरू नाहीत. त्यामुळे, आंदोलनामुळे पडून असलेल्या कचऱ्यावर प्रक्रिया शक्य नाही. त्याच वेळी रोज संकलन होत असून, हा कचरा एकत्र करून रस्त्यांच्या कडेला तसाच ठेवण्यात आला असल्याने पावसात हा कचरा भिजला असून, त्यावर प्रक्रिया करतानाही अडचणी येणार आहेत.

“गेल्या काही दिवसांपासून उरुळी देवाची येथील कचरा प्रक्रिया प्रकल्पाच्या विरोधात ग्रामस्थांचे आंदोलन सुरू आहे. त्यांच्या मागण्यावर चर्चा सुरू आहे. तर या ठिकाणी असलेल्या प्रकल्पातही अडचणी निर्माण झाल्या आहेत ही बाब लक्षात घेऊन इतर प्रकल्पांची क्षमता वाढविण्याच्या सूचना केल्या आहेत. तर हा कचरा सध्या संकलन केला जात असला तरी अनेक भागांत कचरा पडला असून, लवकरच तो उचलला जाईल.”
– संतोष वारुळे