प्रभात वृत्तसेवा पुणे – सावित्रीबाई फुले पुणे विद्यापीठाने परीक्षा शुल्कात २० टक्के वाढ करण्याचा निर्णय घेतला आहे. या निर्णयाला अखिल भारतीय विद्यार्थी परिषदेने विरोध दर्शवला असून, ही शुल्कवाढ त्वरित रद्द करण्याची मागणी केली आहे. महाराष्ट्रातील काही भागांतील भीषण पूरपरिस्थितीच्या पार्श्वभूमीवर ही वाढ अन्यायकारक असून, पाच दिवसांत कार्यवाही न झाल्यास तीव्र आंदोलन करण्याचा इशारा अभाविपने दिला आहे.विद्यापीठाच्या अधिकार मंडळाने २४ सप्टेंबर रोजी परीक्षा शुल्कात वाढ करण्याचा निर्णय घेतला. या निर्णयानुसार आधीच अधिक प्रमाणात आकारण्यात येणाऱ्या छायांकित प्रत आणि पुनर्मूल्यांकन शुल्कामध्ये आणखी भर पडणार आहे. राज्यातील अनेक जिल्हे ओल्या दुष्काळाचा सामना करत आहेत. अशा परिस्थितीत सामान्य घरातील विद्यार्थ्यांसाठी ही शुल्कवाढ अवाजवी आणि अन्यायकारक आहे. हा निर्णय म्हणजे विद्यार्थ्यांचे शैक्षणिक भवितव्य अंधारात ढकलण्याचा प्रकार आहे, असे अभाविपचे पुणे महानगरमंत्री राधेय बाहेगव्हाणकर यांनी म्हटले आहे.
