बालवडकर, धेंडे, ढोरे, मुसळे, पवार, जऱ्हाड, गलांडे आदींच्या हाती घड्याळ पुणे – अर्ज दाखल करण्याच्या शेवटच्या दिवशी भाजप, अन्य पक्षांची उमेदवारी मिळाली नसल्याने अनेकांनी राष्ट्रवादी काॅंग्रेसमध्ये प्रवेश केला. यामध्ये बाणेर-बालेवाडी भागातील माजी नगरसेवक अमाेल बालवडकर, माजी उपमहापौर सिद्धार्थ धेंडे, प्रकाश उर्फ बंडू ढोरे, अर्चना मुसळे, शंकर पवार, संदीप जऱ्हाड, स्मिता गलांडे आदींचा समावेश होता. या पक्षप्रवेशांमुळे आता महापालिका लढतीत रंगत निर्माण झाली असून, चुरशीच्या लढाईत कोणाची बाजू वरचढ ठरते हे पाहणे अत्यंत औत्सुक्याचे झाले आहे. दोन्ही राष्ट्रवादी एकत्र लढणार असल्याने भाजपतील नाराज इच्छुकांनी त्यांच्याकडे उमेदवारीसाठी प्रवेशाची रांगच लागली होती. त्यांना तिकिट मिळाल्याने उभारी मिळाली असून ते आता घड्याळ हातात घालून कमळाविरुद्ध लढायला सज्ज झाले आहेत. गेल्या दोन दिवसांत या घडामोडींना वेग आला. नाही नाही म्हणता दोन्ही राष्ट्रवादींनी हातमिळवणी केली. या एकत्र येण्याचा फायदा भाजपतील नाराज इच्छुकांना झाला आणि त्यांनी लगेचच प्रवेश केला. अजित पवारांनी स्वत: या नाराजांना लाल गालिचा टाकत पक्षात घेतले, त्यांना तिकिटे आणि एबी फाॅर्मही दिले. राष्ट्रवादी काॅंग्रेस शरद्चंद्र पवार पक्षाने ४० एबी फाॅर्म दिले आहेत. राष्ट्रवादी काॅंग्रेस (अप) ने १२५ एबी फाॅर्मचे वाटप केल्याचे पक्षाकडून सांगण्यात आले. दोन्ही राष्ट्रवादींनी खेळी करत आपापसांत प्रभाग वाटून घेतले आहेत. यामध्ये प्रभाग ३३ (शिवणे – खडकवासला) हा शरद पवार यांच्या पक्षाला तर सर्वात मोठा पाच सदस्यांचा असलेला प्रभाग ३८ (कात्रज – आंबेगाव) हा अजित पवार यांच्या पक्षाने वाटून घेतला आहे. राष्ट्र्वादी काॅंग्रेसकडून याहीवेळी गुंडांना तिकिट देण्यात आले आहे. यामध्ये आंदेकर कुटुंबातील दोन महिलांना राष्ट्रवादी काॅंग्रेसने तिकिट दिले आहे. बंडू आंदेकरने अपक्ष अर्ज दाखल केला आहे. याशिवाय कोथरूडमधून गजानन उर्फ गजा मारणे याची पत्नी जयश्री हिला तिकिट देण्यात आले आहे. बालवडकर संतापले राजकारणात अनेक डाव असतात. त्यातला एक डाव माझ्यावर पडला आहे. भाजपला मी असा धोबीपछाड देणार आहे की, भविष्यात त्यांनी असा डाव कोणावर टाकू नये. हुकूमशाही पद्धत योग्य नाही. प्रत्येक पक्षाने मोठे व्हावे, आकाशाला भिडावे, पण पाय जमिनीवर ठेवावे. ग्राऊंड लेव्हलला काम करणाऱ्या कार्यकर्त्यावर असा कोणी अन्याय करत असेल तर माझी जनता माझ्या पाठीशी आहे. हा अमोल बालवडकर भाजपला दाखवून देईल की कार्यकर्ता काय असतो ते, अशी तिखट प्रतिक्रिया बालवडकर यांनी दिली. भारतीय जनता पक्षाची उमेदवारी मिळेल अशी अपेक्षा असलेल्या बालवडकर यांचा अपेक्षाभंग झाल्याने ते संतापले होते.
