Pune Vintage Cars | मागील शतकातील दुर्मिळ व नामवंत अशा हंबर, क्रायस्लर, ऑस्टिन, लिमोझिन, एरियल स्लोपर, मर्सिडीज बेंझ, रोल्स रॉयस, बीएमडब्ल्यू, फोर्ड, इंपाला, शेवरले, एमजी, फोक्सवॅगन, ओव्हर लँड, सिट्रॉन, फियाट अशा १०० हून अधिक दुर्मिळ व्हिंटेज आणि क्लासिक कार्स व १०० हून अधिक दुर्मिळ मोटरसायकल्स व स्कूटर्सचे भव्य प्रदर्शन भरवण्यात आले आले आहे.

या प्रदर्शनाचे  पुण्यातील व्हिंटेज व क्लासिक कार्सचे प्रख्यात संग्राहक योहान पूनावाला यांच्या हस्ते रॉयल वेस्टर्न इंडिया टर्फ क्लब येथे करण्यात आले. यावेळी हजारो पुणेकरांनी गर्दी केली होती. हे प्रदर्शन रविवारी देखील सकाळी १० ते सायंकाळी ६ या वेळेत विमामूल्य खुले राहणार आहे. या प्रदर्शनाचे आयोजन व्हिटेंज अँड क्लासिक कार क्लब ऑफ इंडिया यांनी केले आहे. वेस्टर्न इंडिया ऑटोमोबाईल असोसिएशनचा सहयोग लाभला आहे.

या प्रदर्शनाचे उद्घाटनावेळी योहान पूनावाला म्हणाले की, पुण्यात व्हिंटेज आणि क्लासिक कार प्रदर्शनाचे पुन्हा आयोजन होत आहे, ही आनंदाची बाब आहे. या इव्हेंटला ग्लॅमर आहे. तसेच हा इव्हेंट आनंदही देणारा आहे. त्यामुळेच माझ्या संग्रहातील अनेक व्हिंटेज व क्लासिक गाड्या मी यात प्रदर्शित करतो. पुणेकरांनी फार मोठा प्रतिसाद दिल्याबद्दल त्यांनी पुणेकरांचे आभार मानले.

मुंबईचे अब्बास जसदानवाला यांची भारतातील सर्वात जुनी धावणारी १९०३ ची कार हंबर, सुभाष.बी.सणस व्हिंटेज अँड क्लासिक कार म्युझियमचे सुभाष सणस यांच्या मालकीच्या १२ गाड्या आहेत. नेताजी सुभाषचंद्र बोस कुटुंबीयांनी वापरलेली डॉज किंग्सवे, माजी पंतप्रधान इंदिरा गांधी यांनी वापरलेली कन्व्हर्टेबल इंपाला, हॉलिवूड स्टार अल पचिनो यांची मर्सिडीज बेंझ, बाळासाहेब ठाकरे, अमिताभ बच्चन, विनोद खन्ना, चंकी पांडे यांच्या मर्सिडीज बेंझ, ब्रुनेईचे राजे यांची १९८१ मर्सिडीज-बेंझ लिमोझिन, जर्मन पोलिस प्रमुखांनी वापरलेली १९८२ मर्सिडीज-बेंझ इत्यादी गाड्यांचे कलेक्शन त्यांच्याकडे आहे.

नितीन डोसा यांच्याकडील १९५२ ची मद्रास गव्हर्नर यांची क्रायस्लर कन्व्हर्टिबल, यश रुईया यांच्याकडील १९४७ एमजी, योहान पूनावाला यांच्या संग्रहातील २० व्हिंटेज कार प्रदर्शनात आहेत.  त्यामध्ये १९२७ ची रोल्स रॉयस २० एचपी, १९४९ची बेंटले मार्क ६, १९५९ ची बीएमडब्ल्यू इसेटा ३००, १९६२ची फोक्सवॅगन बीटल, २०१५ ची फेरारी अपर्टा इत्यादी गाड्यांचा समावेश आहे.

श्रीकांत आपटे यांची १९३१ ची शेवरले, शेखर सावडेकर यांची १९४२ची फोर्ड जीप, १९१९ ओव्हर लँड, धनंजय बदामीकर यांच्या संग्रहातील १० व्हिंटेज कार प्रदर्शनात असून १९४६ची सिट्रॉन ट्रॅक्शन अवंत, हरित त्रिवेदी यांची १९३१ची एरियल स्लोपर, संजय साबळे यांच्या संग्रहातील ५ व्हिंटेज कार, डॉ. प्रभा नेने यांची ऑस्टिन ७ व अन्य सेलिब्रिटीज यांच्या व्हिंटेज कार्सचा समावेश आहे.

बॅाबीफेम राजदूत गाडीने वेधले लक्ष 

या व्यतिरिक्त ‘बॉबी’ फेम राजदूत मोटार सायकल, १९३८ची सर्वात जुनी मोटारसायकल नॉर्टन 500 देखील प्रदर्शनात ठेवण्यात आली आहे. पुणेकरांनी या प्रदर्शनासाठी मोठा प्रतिसाद दिला. याबद्दल नितीन डोसा आणि सुभाष सणस यांनी पुणेकरांचे आभार मानले. तसेच रविवारी देखील हे पदर्शन असून बघण्यास यावे, असे आवाहन केले आहे.