Rain in Pune :  गेल्या काही दिवसांपासून विश्रांती घेतलेल्या पावसाचा जोर पुण्यात वाढताना पाहायला मिळत आहे. पुणे जिल्ह्यात आज  दि. १४ जून रोजी वादळी वाऱ्यासह मुसळधार पावसाची शक्यता हवामान खात्याने वर्तवली आहे.

तसेच घाटमाथा परिसरातही पावसाची जोरदार शक्यता असल्याचे म्हटले आहे. यामुळे नागरिकांनी घराबाहेर पडताना काळजी घेण्याचे आवाहनही करण्यात आले आहे. हवमान विभागाने जिल्ह्याला अॅारेंज अलर्ट जारी केला आहे.

पुढील दोन दिवसांत मान्सून विदर्भाच्या काही भागांत, छत्तीसगड आणि ओडिशामध्ये आणखी पुढे सरकण्यासाठी अनुकूल वातावरण आहे. त्यानतंर तीन दिवसांत गुजरात, पश्चिम बंगाल, झारखंड आणि बिहारच्या काही भागांमध्ये मान्सून पुढील वाटचाल करण्यासाठी अनुकूल परिस्थिती असल्याचे सांगण्यात आले आहे.

काल झालेल्या मुसळधार पावसामुळे शहरातील अनेक रस्त्यांना नदीचे स्वरुप आले होते. पाणी रस्त्यावर साचल्याने वाहन चालकांना नाहक त्रास सहन करावा लागला. रस्त्यात असणारे खड्डे दिसनासे झाले, परिणामी अनेक दुचाकीस्वार अपघातग्रस्त झाले. शहरात गुरुवारी आणि शुक्रवारी झालेल्या पावसामुळे विविध ठिकाणी ३४ झाडपडीचा घटना देखील घडल्या आहेत. सुदैवाने कोणीही जखमी झाले नसल्याची माहिती अग्निशामक दलाच्या वताने देण्यात आली आहे.

दिवे घाटात ढगफुटीसदृश्य पाऊस 

पुण्यातील डोंगर माथ्यावर मुसळधार पाऊस झाला आहे. त्यामुळे घाट परिसरात धबधबे ओसंडून वाहत होते. पुण्यापासून काही अंतरावर असलेल्या दिवे घाटात ढगफुटीसदृश्य पाऊस झाला. यामुळे येथील माध्यावर धबधबे ओसंडून वाहत होते. मोठ्या प्रमाणावर घाटच्या रस्त्यावर पाणी आले होते. यामुळे वाहनचालकांना मोठ्या कसरताचा सामाना करावा लागला.