Pune Rain – गेल्या आठवड्यापासून ४२ अंशावर पोहचलेल्या तापमानामुळे उन्हाचा चटका आणि उकाड्याने घामेघुम झालेल्या पुणेकरांना गारांच्या पावसाने लावलेल्या हजेरीने दिलासा मिळाला. बुधवारी (दि. २२) सायंकाळी सहाच्या सुमारास शहराच्या मध्यवर्ती भागासह उपनगरात गारांच्या पावसाने झोडपले. कोथरूड, पाषाण, वारजे, बाणेर, सिंहगड रोड आणि हिंजवडी परिसरात जोरदार पावसाच्या सरी पडल्या. त्यामुळे नागरिकांची तारांबळ उडाली पण, उकाड्यापासून दिलासाही मिळाला. मात्र, शहराच्या बऱ्याच भागात पावसाने नाममात्र हजेरी लावली. यामुळे पाऊस झालेल्या ठिकाणी दिलासा तर अन्यत्र नागरिकांची घालमेल असे चित्र होते. शहरातील लोहगावसह अन्य परिसरातील उष्णतेचा पारा ४० ते ४२ अंशावर जावून पोहचला. उष्णतेची लाट जसजशी वाढत होती, तस-तसे पुणेकरांना उन्हाचा चटका असह्य झाला. नागरिक उकाड्याने हैराण झाले. गेल्या दोन ते तीन दिवसांपासून हवामानातील बदलामुळे दुपारनंतर ढगाळ वातावरण असल्याने उन्हाचा चटका काहीसा कमी झाला असला तरी उकाडा कायम होता. आज सकाळपासून पुणे शहर, उपनगरांमध्ये उन्हाचा चटका जाणवत होता. मात्र, दुपारनंतर अचानक ढग दाटून आले आणि सायंकाळी सोसाट्याच्या वाऱ्यासह गारांच्या पावसाने जोरदार हजेरी लावली. अवकाळी पाऊस, पुणे कोथरूड, पाषाण, बाणेर, वारजे, सिंहगड रोड आणि हिंजवडी परिसरात पावसाचा जोर अधिक होता. तसेच शिवाजीनगर, औंध, कात्रज यासह अन्य परिसरातही पाऊस झाला. अनेक ठिकाणी गारांचा पाऊस झाल्यामुळे रस्त्यांवर गारांचा पांढरा शुभ्र थर साचल्याने काश्मीरसारखे दृश्य पाहायला मिळाले. या पावसामुळे वातावरणात गारवा निर्माण झाला. अचानक आलेल्या पावसामुळे चाकरमान्यांची मोठी तारांबळ उडाली. काही भागात झाडे कोसळण्याच्या घटना घडल्या असून सखल भागात पाणी साचल्याने वाहतुकीवर परिणाम झाला. दोन दिवस हलका पाऊस भारतीय हवामान विभागाने पुण्यासाठी यलो अलर्ट दिला होता. बंगालच्या उपसागरावरून येणारे बाष्प आणि स्थानिक उष्णतेच्या प्रभावामुळे हा अवकाळी पाऊस पडत असल्याचे हवामान तज्ज्ञांनी सांगितले. या पावसामुळे कमाल तापमानात मोठी घट झाली असून कडाक्याच्या उन्हापासून नागरिकांना दिलासा मिळाला आहे. दरम्यान, पुढील दोन दिवस शहरासह जिल्ह्यासाठी पावसाचा यलो अलर्ट असून, दुपारनंतर ढगाळ वातावरण आणि सोसाट्याच्या वाऱ्यासह हलका पाऊस पडण्याचा अंदाज हवामान विभागाने वर्तविला आहे. बुधवारचे तापमान लोहगाव ४०.७, पुरंदर ४०, शिवाजीनगर ३९.४, चिंचवड ३८.७, वडगावशेरी ३८.६, हवेली ३७.९, पाषाण ३७.५, एनडीए ३७.३, नारायणगाव ३७, शिरूर ३६.६, माळीण ३५.७, हडपसर ३३.२ अंश सेल्सिअस .
