पुणे – राज्य महिला आयोगाच्या अध्यक्ष रुपाली चाकणकर यांच्या घरासमोर आंदोलन करणाऱ्या शिवसेनेच्या (उद्धव बाळासाहेब ठाकरे) महिला आघाडीच्या पदाधिकाऱ्यांविरुद्ध नांदेड सिटी पोलीस ठाण्यात गुन्हा दाखल करण्यात आला. याप्रकरणी शिवसेनेच्या (उद्धव बाळासाहेब ठाकरे) महिला आघाडीच्या उपशहर संघटिका रेखा कोंडे, स्वाती कथलकर, विद्या होडे, सरोज कार्वेकर, स्नेहा कुलकर्णी, मृण्मयी लिमये, जयश्री भणगे यांच्यासह चार ते पाच महिला पदाधिकाऱ्यांविरुद्ध गुन्हा दाखल करण्यात आला आहे. याबाबत पोलीस हवालदार नितीन खुटवड यांनी नांदेड सिटी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, आत्महत्या करणाऱ्या महिलेबाबत असंवेदनशील वक्तव्य केल्याचा आरोप करून शिवसेना महिला आघाडीच्या पदाधिकाऱ्यांनी राज्य महिला आयोगाच्या अध्यक्ष रुपाली चाकणकर यांच्या घरासमोर दुपारी सव्वातीनच्या सुमारास आंदोलन केले. पोलीस परवानगी न घेता आंदोलन केल्याप्रकरणी शिवसेनेच्या महिला पदाधिकाऱ्यांविरुद्ध पोलिसांनी गुन्हा दाखल केला आहे. सहायक पोलीस निरीक्षक अमृता पाटील पुढील तपास करीत आहेत.
