Pune Porsche Crash । पुण्यात पोर्श कारने एका दुचाकीला धडक दिली. या अपघातात दोन अभियंत्यांचा मृत्यू झाला होता. पुण्यातील नामांकित बांधकाम व्यावसायिकाचा अल्पवयीन मुलगा त्यावेळी ही पोर्श कार चालवत होता. अपघातानंतर पोलिसांनी त्याला ताब्यात घेतलं होतं. मात्र अवघ्या काही तासांनी त्याला जामिनावर सोडण्यात आलं. त्यामुळे राज्यभरातून संतापाची लाट उसळली. दरम्यान, या प्रकरणातील अल्पवयीन आरोपीच्या चेहऱ्याशी थोडंफार साम्य असलेल्या तरुणाने एक रॅप साँग बनवून सोशल मीडियावर शेअर केलं. हे गाणं खूप व्हायरलही झालं. त्यामुळे या घटनेबद्दल आणखी चीड निर्माण झाली होती. अशातच हे रॅप साँग गाणाऱ्या तरुणाविरोधात सायबर पोलिसांनी गुन्हा दाखल केला.यावरच प्रतिक्रिया देणारा आणखी एक व्हिडीओ त्याने शेअर केलाय.

मूळ प्रकरणावरून सर्वांचं लक्ष हटवण्यासाठी Pune Porsche Crash ।

आर्यन देव नीखरा असे या एन्फ्लुएन्सरचं नाव आहे.  त्याने तयार केलेल्या गाण्यामुळे लोकांमध्ये या घटनेविषयी आणखी चीड निर्माण झाली होती. अखेर आर्यनविरोधात माहिती तंत्रज्ञान कायद्याच्या अंतर्गत गुन्हा दाखल करण्यात आलाय. आता हा गुन्हा दाखल झाल्यानंतर आर्यनने आणखी एक व्हिडीओ जारी करून प्रशासनावरील संताप व्यक्त केला. “मूळ प्रकरणावरून सर्वांचं लक्ष हटवण्यासाठी माझ्यावर कारवाई करण्यात आलीय”, असा आरोप या व्हिडिओच्या माध्यमातून आर्यनने केलाय. “मी कोणालाही शिवीगाळ केली नव्हती, मी एक सामान्य माणूस असल्यामुळे माझ्यावर ही कारवाई करण्यात आली आहे”, असे  त्याने म्हटले आहे.

माझ्या आयुष्याची काहीच किंमत नाही Pune Porsche Crash ।

आर्यन नीखराने नवीन व्हिडीओमध्ये,“त्या लोकांनी माझ्यावर कलम ४१ अ अंतर्गत गुन्हा दाखल केला आहे. तसेच कलम ५९ आणि २९४ ही कलमंदेखील लावली आहेत. यामागे त्यांचं एकमेव उद्दिष्ट आहे, ते म्हणजे मूळ प्रकरणावरून लक्ष हटवून सर्व लाईमलाईट माझ्यावर यावी. त्यांनी असं केलं कारण तो (अल्पवयीन आरोपी) एक कोट्यधीशाचा मुलगा आहे आणि मी एक मध्यमवर्गीय तरुण आहे. ते लोक माझा खून करू शकतात. कारण माझ्या आयुष्याची काहीच किंमत नाही. मला एवढंच सांगायचं आहे की मी दोन व्हिडीओ शेअर केले होते आणि या दोन्ही व्हिडीओंमध्ये मी कोणालाही आई किंवा बहिणीवरून शिवी दिली नव्हती. मी केवळ महिलांसाठी आवाज उठवला होता. मी कोणाबद्दलही काहीच वाईट बोललो नव्हतो. मी केवळ शाब्दिक कोटी करण्याचा प्रयत्न केला होता. मी कुठल्याही व्यक्तीचं नाव घेतलं नव्हतं. मी एक पॅरोडी रॅप बनवलं होतं.”