Pune Police – इतरांच्या मृत्यूला कारणीभूत ठरणाऱ्या ट्रिपल सीट वाहन चालक शहर वाहतूक पोलिसांच्या रडारवर आहेत. १० फेब्रुवारीपासून पोलिसांनी राबविलेल्या मोहिमेत ९८८ वाहने जप्त केली आहेत. ट्रिपल सीट व इतर वाहतूक नियमभंग प्रकरणी ५,३८० वाहन चालकांवर कारवाई केली असून दंडापोटी बेशिस्त वाहनचालकांनी १ कोटी ३ लाख २५ हजार १५० रुपये दंडापोटी शासनाकडे जमा केले आहेत. शहरातील प्रमुख रस्ते, चौक आणि वाहतूक कोंडीच्या ठिकाणी वाहतूक शाखा, पोलीस ठाण्यांच्या पथकांनी एकाच वेळी कारवाई केली. या कारवाईवेळी एकूण २,६४९ ट्रिपल सीट वाहनांवर कारवाई करुन ९८८ वाहने जप्त केली. याव्दारे २१३७ चलन तत्काळ पेड करुन घेत शासनाकडे २१ लाख ३७ हजार रुपये जमा करण्यात आले . या शिवाय विविध नियमभंगाबाबत १३,३०८ वाहनचालकांवर कारवाई करण्यात आली. तसेच १० फेब्रुवारी पासून आजपर्यंत ट्रिपल सीट व इतर वाहतूक नियमभंग प्रकरणांमध्ये एकूण ५,३८० वाहन चालकांवर कारवाई करण्यात आली असून, १ कोटी ३ लाख २५ हजार १५० रुपये दंडापोटी शासनाकडे जमा करण्यात आली आहे.या मोहिमेत पुणे शहर वाहतूक विभागातील ३० वाहतूक विभाग तसेच ४४ पोलीस ठाण्यामधील अधिकारी व कर्मचारी सहभागी झाले होते. दुचाकीवर ट्रिपल सीट प्रवास करणे हा कायद्याने दंडनीय गुन्हा असून त्यामुळे अपघाताचा धोका वाढतो. सर्व नागरिकांनी वाहतूक नियमांचे पालन करून सुरक्षित व जबाबदार वाहनचालना करावी, असे आवाहन वाहतूक पोलिसांनी केले आहे.पुणे शहरातील वाहतूक शिस्तबद्ध ठेवण्यासाठी अशा विशेष मोहिमा पुढेही सातत्याने राबविण्यात येणार असल्याची माहिती पोलिसांनी दिली आहे.
