Pune Orange Alert – शहरात सोमवारी (दि. २७) सकाळपासून संततधार पावसाने हजेरी लावल्याने पुणेकर ओलेचिंब झाले. हवामान विभागाच्या (मुंबई वेधशाळा) अंदाजानुसार पुढील पाच दिवस जिल्ह्यात जोरदार पावसाची शक्यता आहे. त्‍यामुळे जिल्ह्याला ऑरेंज अलर्ट जारी केला आहे. घाटमाथ्यावरील जोरदार पावसामुळे अनेक नद्या दुथडी भरून वाहत असून धरणांच्या पाणीसाठ्यातही वेगाने वाढ होत आहे.

बंगालच्‍या उपसागरात कमी दाबाचा पट्टा निर्माण झाल्‍याने पुढे काही दिवस राज्‍यात पावसाची ही स्थिती कायम राहणार आहे. सोमवारी सकाळपासून पावसाने जोर धरला होता. कमाल तापमान घसरल्याने दिवसभर वातावरणात गारठाही होता. पावसाने विद्यार्थी व चाकरमान्‍यांची गैरसोय झाली. अनेकजण तयारीनिशी बाहेर पडले होते. पावसाने नदीकाठच्या भागातील नागरिकांनी सतर्क राहण्याचे आवाहनही प्रशासनाने केले आहे.

जिल्ह्यात रविवारी (दि. २६) रात्रीपासून सुरू असलेल्या पावसाचा प्रभाव सोमवारी (दि.२७) सकाळपर्यंत कायम राहिला. घाटमाथ्यावरील लोणावळा येथे सर्वाधिक १११ मिलीमीटर पावसाची नोंद झाली. शहरातील बहुतांश भागात हलका ते मध्यम स्वरूपाचा पाऊस झाला. शिवाजीनगर येथे ११.७ मिमी आणि कोरेगाव पार्कला ११ मिमी पाऊस झाला. हडपसरला २.५ मिमी पावसाची नोंद झाली.

कमाल तापमानाच्या नोंदीत कोरेगाव पार्क (२७.७), शिवाजीनगर (२७.६), पाषाण (२७.०) आणि आंबेगाव (२७.०) अंश सेल्सिअस तापनमानाची नोंद झाली. घाटमाथ्यावर जोरदार पाऊस सुरू असल्याने धरणांच्या पाणलोट क्षेत्रात पाण्याची आवक वाढण्याची शक्यता आहे, पुढील काही दिवस पुणे जिल्ह्यात ढगाळ वातावरणासह काही ठिकाणी मध्यम ते जोरदार पावसाची शक्यता आहे.