पुणे : रेल्वे परिसरात हरवलेल्या आणि असुरक्षित अवस्थेत आढळणाऱ्या मुलांना वाचवण्यासाठी रेल्वे विभागाच्या बाल बचाव मोहिमेला मोठे यश मिळाले आहे. या मोहिमेचा आढावा घेण्यासाठी 18 नोव्हेंबर 2024 रोजी अतिरिक्त विभागीय रेल्वे व्यवस्थापक (एडीआरएम) ब्रिजेश कुमार सिंह यांच्या अध्यक्षतेखाली पुण्यात त्रैमासिक समन्वय बैठक पार पडली.

या बैठकीला वरिष्ठ विभागीय सुरक्षा आयुक्त प्रियांका शर्मा, स्थानिक पोलीस स्टेशन प्रभारी अधिकारी, रेल्वे पोलीस अधिकारी आणि चाइल्ड हेल्प डेस्कचे प्रतिनिधी उपस्थित होते. बैठकीत रेल्वे परिसरात आढळणाऱ्या मुलांच्या सुरक्षिततेसाठी लागू करण्यात आलेल्या मानक कार्यप्रणाली (SOP) च्या प्रभावी अंमलबजावणीवर चर्चा करण्यात आली.

228 मुलांचा बचाव आणि सुपूर्ती

जानेवारी ते ऑक्टोबर 2024 या दहा महिन्यांत रेल्वेच्या बाल बचाव मोहिमेद्वारे 228 मुलांना सुरक्षितपणे सुटका करून चाइल्ड वेल्फेअर कमिटी (CWC) कडे सुपूर्द करण्यात आले आहे. या कार्याचा उल्लेखनीय उल्लेख करत, उपस्थित अधिकाऱ्यांना भविष्यातही ही मोहीम अधिक प्रभावीपणे राबवण्याच्या सूचना देण्यात आल्या.

SOP नुसार अंमलबजावणी

बैठकीत SOP मध्ये नमूद असलेल्या मुलभूत सुविधांबाबत सविस्तर चर्चा झाली. याशिवाय, बाल बचाव मोहिमेदरम्यान कोणत्याही प्रकारच्या अडचणी आल्यास, अतिरिक्त विभागीय रेल्वे व्यवस्थापकांशी थेट संपर्क साधण्याचे आवाहन करण्यात आले. रेल्वे प्रशासनाने समस्यांच्या त्वरेने निराकरणाचे आश्वासन दिले.

रेल्वे प्रशासनाने मुलांच्या सुरक्षेसाठी घेतलेला पुढाकार आणि बचाव मोहिमेत आलेली प्रगती यामुळे विभागाचे कार्य कौतुकास्पद ठरत आहे. यापुढेही या मोहिमेत अधिक समर्पणाने योगदान देण्याचा निर्धार बैठकीत व्यक्त करण्यात आला.