प्रभात वृत्तसेवा
पुणे – देशाच्‍या सर्वोत्‍कष्ट शैक्षणिक संस्‍थांच्‍या क्रमवारीत (एनआयआरएफ) सावित्रीबाई फुले पुणे विद्यापीठाचे विद्यापीठ गट व सर्वसाधारण गटाच्‍या मानांकनात मोठी घसरण झाली आहे. देशात विद्यापीठ गटातून पुणे विद्यापीठाने ५६वे स्‍थान मिळविले असून गतवर्षी हे मानांकन २३व्‍या स्‍थानावर होते. तसेच, विद्यापीठाने सर्वसाधारण गटातून यावर्षी देशात ९१ वे स्‍थान मिळविले आहे. गतवर्षी हे स्‍थान ३७व्‍या स्‍थानावर होते. यावरून सावित्रीबाई फुले पुणे विद्यापीठाचे मानांकनात झालेली घसरण स्‍पष्ट होत आहे.

मात्र, सिंबायाेसिस विद्यापीठ व डाॅ.डी. वाय. पाटील विद्यापीठ या खासगी संस्‍थांचे मानांकनात सुधारणा झाली आहे.एनआयआरएफ रॅकिंग गुरूवारी जाहीर करण्यात आले. यात सर्वसाधारण गट, विद्यापीठ गट, महाविद्यालय, संशोधन संस्‍था, अभियांत्रिकी, व्‍यवस्‍थापन, फार्मसी, मेडीकल, डेंटल, विधी अर्थात लाॅ, अॅग्रीकल्‍चर या गटातील देशातील पहिल्‍या शंभर संस्‍थांची यादी जाहीर प्रसिद्ध करण्यात आली. यंदा देशातील सर्वोत्तम शंभर विद्यापीठात पुण्यातील चार विद्यापीठांचा समावेश आहे.

यात सिंबायोसिस विद्यापीठ (२४), डाॅ. डी. वाय. पाटील विद्यापीठ (४१), सावित्रीबाई फुले पुणे विद्यापीठ (५६) आणि भारती विद्यापीठाचा (५९) समावेश आहे.फार्मसी गटात पूना काॅलेज आॅफ फार्मसी (३४), डाॅ. डी. वाय. पाटील फार्मसी (३५), डाॅ. विश्वनाथ कराड एमआयटी वर्ल्ड पीस युनिव्‍हर्सिटी (७०) आणि पीईएसचे माॅडर्न काॅलेज आॅफ फार्मसनी ९२ वे क्रमांक मिळवले आहे. विधी गटात सिंबायोसिस लाॅ स्‍कूने देशात सातवे क्रमांक मिळविले आहे. मेडिकलमध्ये डाॅ. डी. वाय. पाटील विद्यापीठाने १२ वे स्‍थान मिळविले आहे.

महाविद्यालय गटातून फर्गसन महाविद्यालयाने ५७ वे क्रमांक मिळविला. रिसर्च इन्स्टिट्यूट या गटात पुण्यातील आयसरने ३५ वे क्रमांक मिळविले आहे. अभियांत्रिकी गटात सिंबायोसिस (४६), सीओईपी (९०) आणि डिफेन्स इन्स्टिट्यूट आॅफ अॅडव्‍हान्‍स टेक्‍ाॅनाॅजी या महाविद्यालयाने ९२ वे क्रमांक मिळविले आहे. व्‍यवस्‍थापन गटात सिंबायोसिस इन्स्टिट्यूट आॅफ बिझिनेस मॅनेजमेंट या संस्‍थेने ११ वे क्रमांक मिळवले आहे.