Pune News : महापालिकेच्या १५ क्षेत्रीय कार्यालयांतील जन्म-मृत्यू नोंदणी विभागासाठी आवश्यक (Pune News) असलेल्या बोधचिन्हासह वॉटरमार्क पेपरचा पुरवठा करण्यात आला असतानाही निविदेचा ठराव खात्याला प्राप्त न झाल्याने पुढील प्रशासकीय प्रक्रिया रखडल्याचे समोर आले आहे.

स्थायी समितीने ६ ऑगस्ट रोजी संबंधित निविदेला मंजुरी दिली आहे. मात्र, अद्याप ठराव विभागाला मिळालेला नसल्याने कामकाजात अडथळा निर्माण झाला असून या प्रकरणी ठेकेदाराने महापालिका आयुक्तांकडे लेखी तक्रारच दाखल केली आहे.

जन्म-मृत्यू दाखल्यांसाठी वॉटरमार्क पेपर खरेदी करण्यासाठी महापालिकेच्या मध्यवर्ती (Pune News) भांडार विभागामार्फत निविदा प्रक्रिया राबविण्यात आली होती. या प्रक्रियेत नमन एंटरप्रायझेस यांची निविदा कमीदराची आली. मात्र, निविदांना स्थायी समितीची मान्यता नसल्याने नागरिकांची गैरसोय झाली होती.

परिणामी, निविदा मंजूरीच्या आधीच संबधित विभागाच्या उपायुक्तांच्या आदेशानुसार संबंधित साहित्याचा संपूर्ण पुरवठा १६ जुलै रोजीच जन्म-मृत्यू नोंदणी कार्यालयास करण्यात आला. त्यानंतर, या कामाची निविदा ६ ऑगस्ट रोजी मान्य करण्यात आली.

मात्र, साहित्याचा पुरवठा झाल्यानंतरही निविदेला स्थायी समितीची मंजुरी मिळून जवळपास तीन आठवडे उलटले असताना संबंधित ठराव खात्याला प्राप्त झालेला नाही. त्यामुळे पुढील प्रक्रिया रखडली आहे. त्यामुळे तातडीनं ठराव (Pune News) मंजूर करावेत असे पत्रच ठेकेदाराने महापालिका आयुक्तांना दिले आहे.तसेच या प्रकरणी तत्काळ कारवाईची मागणी केली आहे. मात्र, या प्रकारामुळे महापालिकेतील टक्केवारीचा मुद्दा पुन्हा एकदा ऐरणीवर आला आहे.