Pune News – भाजपच्या कार्यकारिणी शिबिरासाठी मुख्यमंत्री देवेंद्र फडणवीस सोमवारी पुण्यात येत असतानाच मराठा आरक्षणाचा मुद्दा पुन्हा ऐरणीवर आला आहे. फडणवीस, तसेच मराठा आरक्षण उपसमितीचे अध्यक्ष मंत्री राधाकृष्ण विखे पाटील यांना थेट सवाल करणारे आक्रमक फ्लेक्स शहरातील विविध भागांत आणि मुख्यमंत्र्यांच्या संभाव्य मार्गावर लावले आहेत.

कुणबी नोंद नसलेल्या मराठ्यांच्या मराठा म्हणून मिळालेल्या एसईबीसी आरक्षणाचे काय?’ असा थेट प्रश्न या फ्लेक्सच्या माध्यमातून विचारण्यात आला आहे. मुख्यमंत्र्यांच्या कार्यक्रमाच्या ठिकाणी जाणाऱ्या मार्गावरील दोन फ्लेक्स महापालिका प्रशासनाने काढून टाकल्याने मराठा क्रांती मोर्चाने संताप व्यक्त केला आहे. मराठा समाजाचे दोन फ्लेक्स काढलेत, आम्ही शेकडो लावलेत.

पालिका प्रशासनाचा जाहीर निषेध, अशी भूमिका मोर्चाने घेतली आहे. फडणवीस कोणत्याही मार्गाने पुण्यात या किंवा येथून जा, मराठा समाजाचे फ्लेक्स काढाल, तर शहरभर आमचे फ्लेक्स आणि आमचे प्रश्न दिसणारच, असा इशारा मराठा क्रांती मोर्चा पुणेचे सचिन आडेकर यांनी दिला आहे. जंगली महाराज रोडवरील राणी लक्ष्मीबाई पुतळा चौक, छत्रपती संभाजी महाराज पुतळा चौक,

लकडी पूल चौक, अलका चौक, नळस्टॉप चौक, पत्रकार भवन, नवी पेठ, तसेच गणेश कला-क्रीडा मंदिराकडे जाणाऱ्या मार्गावर मोठ्या प्रमाणावर फ्लेक्स लावण्यात आले आहेत. अलका चौक ते गणेश कला-क्रीडा मंदिर या मार्गासह स्वारगेट, येरवडा आणि शिवाजीनगर परिसरातही फ्लेक्स लावण्यात आले आहेत.