Pune News : निर्माल्याचा कंटेनर भरत चाललेला… त्यात हार, फुले, पाने आणि इतर निर्माल्याचा ढीग… अशा परिस्थितीत चुकून गेलेले (Pune News) अडीच ग्रॅमचे सोन्याचे मंगळसूत्र शोधण्याचे आव्हान पाषाणमधील कचरावेचकासमोर होते. मात्र, नागरिकाचा विश्वास आणि मौल्यवान वस्तू परत करण्याची जिद्द यामुळे अरविंद निवृत्ती शिंदे यांनी अंधारात बॅटरीच्या प्रकाशात कंटेनरमध्ये उतरून मंगळसूत्राचा शोध घेतला.

बराच वेळ शोध घेतल्यानंतर त्यांच्या हाती मंगळसूत्र लागले आणि चिंतेत असलेल्या नागरिकाच्या चेहऱ्यावर पुन्हा समाधानाचे भाव उमटले पाषाणमधील वाकेश्वर घाट येथे गौरी-गणपतीच्या निर्माल्य संकलनादरम्यान ही घटना घडली.

नागरिकाने परंपरागत गौराईला घातलेले मंगळसूत्र चुकून निर्माल्यासोबत कंटेनरमध्ये (Pune News) गेले. सुमारे २० ते २५ मिनिटांनी ही बाब लक्षात आल्यानंतर त्यांनी संकलन केंद्राशी संपर्क साधला. तोपर्यंत कंटेनरमध्ये वरून मोठ्या प्रमाणात निर्माल्य जमा झाले होते. मंगळसूत्र नेमके कुठे गेले याचा अंदाजही येत नव्हता.

तरीही शिंदे यांनी कंटेनरमध्ये उतरून बॅटरीच्या प्रकाशात फुले, पाने आणि हार बाजूला करत शोध सुरू केला. मात्र, हार आणि निर्माल्याच्या ढिगाऱ्यात शोध घेत असताना अखेर त्यांना मंगळसूत्र दिसले. त्यांनी ते काळजीपूर्वक बाहेर काढून संबंधित नागरिकाच्या स्वाधीन केले.

हे केवळ अडीच ग्रॅम सोन्याचे मंगळसूत्र नव्हते, तर नागरिकाच्या कुटुंबाच्या श्रद्धेशी (Pune News) जोडलेली वस्तू होती. ते परत मिळाल्याचा आनंद नागरिकांसोबत मलाही झाला. नागरिक आमच्यावर विश्वास ठेवून निर्माल्य देतात; तो विश्वास जपणे ही आमची जबाबदारी आहे, असे शिंदे यांनी सांगितले.