pune news : यंदाच्या दिवाळीत सोन्याची जोरदार खरेदी करण्यात येत आहे. मात्र, साडेतीन मुहुर्तांपैकी असलेल्या दिवाळी पाडव्याला सोन्याची खरेदी करण्याची परंपरा आहे. त्यानुसार मंगळवारी, दि.14 रोजी सोन्याला मागणी जास्त असणार आहे. त्यासाठी सराफी बाजार सज्ज झाला आहे. मागील वर्षीच्या तुलनेत जास्त विक्री होण्याचा सराफा व्यावसायिकांचा अंदाज आहे.

सोने खरेदीची परंपरा, भारतीयांचे सोन्याच्या आभूषणांबद्दल वाढते आकर्षण, सोन्याच्या किंमतीत होणारी वाढ आणि आगामी लग्नसराई लक्षात घेता, यंदाच्या दिवाळी पाडव्याला सोन्याला मोठी मागणी असणार आहे. सोने हेच सुरक्षित आणि भरवश्‍याचे गुंतवणुकीचे माध्यम आहे.

या पार्श्‍वभूमीवर दिवाळी पाडव्यासाठी सराफा बाजारपेठ सज्ज झाली आहे. कित्येकांनी आगाऊ ऑर्डरही दिल्या आहेत. त्यापैकी काहींना मुहूर्तावर सोने हवे आहे. तर काहींना तुलसी विवाहाच्या वेळी सोने हवे आहे.

पूर्वी दागिने म्हणून सोन्याची खरेदी केली जायची. मात्र, आता त्याकडे गुंतवणूक लोक पाहू लागले आहेत. अशा लोकांकडून सोन्याची मोठ्या प्रमाणात खरेदी करण्यात येत आहे. आधुनिक काळात सोन्याच्या दागिन्यांनाही अनेक पर्याय आहेत. तरीही “गोल्ड इज गोल्ड’ म्हणत सोने खरेदी करण्यात येत आहे.

दरवर्षी दिवाळी पाडव्याला सोन्याला मागणी जास्त असते. ती यंदाही असणार आहे. त्यात दोन-तीन दिवसांत सोन्याच्या भावात अल्पशी घट झाली आहे. त्याचा नागरिकांना फायदा होणार आहे. पाडव्याला नाणी, वेढणी आणि दागिन्यांना मागणी जास्त असते.
– वास्तूपाल रांका, रांका ज्वेलर्स

धनत्रयोदशी, लक्ष्मी पूजनाच्या दिवशी सोन्याला चांगली मागणी होती. आता दिवाळी पाडव्याला त्यापेक्षाही जास्त मागणी असणार आहे. लग्नसराई सुरू होणार आहे. त्यासाठी नागरिकांकडून दागिन्यांची खरेदी करण्यात येत आहे. लग्नाचे दागिने, साखरपुड्याच्या अंगठ्यांच्या आगाऊ ऑर्डरही आहेत.
– नितीन अष्टेकर, अष्टेकर ब्रदर्स