Pune news : पुण्यातील उदयोन्मुख प्रीमियम को-वर्किंग स्पेस पुरवठादार सीसी अँड कंपनी (को क्रीएटर्स अँड कंपनी) यांनी कोथरूड येथील गोखले बिझनेस बेमध्ये आपल्या सर्वात मोठ्या आणि अत्याधुनिक प्रीमियम को-वर्किंग स्पेस केंद्राची सुरुवात केली आहे. आधुनिक उद्योगविश्वाच्या बदलत्या गरजा लक्षात घेऊन विकसित करण्यात आलेल्या या नव्या कार्यक्षेत्रामध्ये उच्च दर्जाच्या पायाभूत सुविधा, लवचिक तसेच मॅनेज्ड ऑफिस सोल्यूशन्स आणि उत्कृष्ट कार्यानुभव यांचा संगम साधण्यात आला आहे.

गोखले बिझनेस बे येथील नव्या सीसी अँड कंपनीच्या केंद्रात १६० व्यक्तींसाठीची आसन क्षमता आहे. येथे १६ स्वतंत्र संचालक कक्ष (डायरेक्टर्स केबिन्स), तसेच ४ ते १२ जणांच्या क्षमतेचे अत्याधुनिक ऑडिओ-व्हिज्युअल तंत्रज्ञानाने सुसज्ज असे चार कॉन्फरन्स हॉल आहेत. याशिवाय, ३ ते १८ जणांच्या क्षमतेच्या विविध प्रकारच्या वर्कस्टेशन्सची सुविधा उपलब्ध असून, त्यापैकी काही स्वतंत्र आहेत तर काहींना संलग्न संचालक कक्षाची सुविधाही देण्यात आली आहे.

ऊर्जादायी आणि चैतन्यमय स्वागत कक्षापासून ते सुबक अंतर्गत सजावटीपर्यंत प्रत्येक बाबीची काळजी घेऊन हे कार्यक्षेत्र विकसित करण्यात आले असून, सर्व प्रकारच्या उद्योगांसाठी उत्पादकता वाढवण्यासाठी पोषक, व्यावसायिक आणि उत्साहपूर्ण वातावरण तयार करण्याचा यशस्वी प्रयत्न येथे करण्यात आला आहे.

या नव्या केंद्राचे एक महत्त्वाचे वैशिष्ट्य म्हणजे विशेषतः तयार करण्यात आलेला कोलॅबोरेशन एरिया. सादरीकरणे, नेटवर्किंग सत्रे, कार्यशाळा आणि टॉक शो यांसारख्या उपक्रमांसाठी हा भाग विकसित करण्यात आला असून, सदस्यांमध्ये परस्परसंवाद, नवकल्पना आणि व्यावसायिक समुदायाची निर्मिती होण्यास तो प्रोत्साहन देतो.

यावेळी बोलताना सीसी अँड कंपनीचे संस्थापक निलेश सुळे म्हणाले, “गेल्या काही वर्षांत उद्योगजगताचा कार्यालयीन जागेकडे पाहण्याचा दृष्टिकोन मोठ्या प्रमाणात बदलला आहे. आज कंपन्यांना मोठी भांडवली गुंतवणूक न करता लवचिकता, सोयीसुविधा, उत्कृष्ट पायाभूत सुविधा आणि व्यावसायिक वातावरण असलेली कार्यालयीन जागा हवी असते आणि त्यानुसारचा सीसी अँड कंपनीच्या सर्व केंद्राची रचना करण्यात आली आहे.”

सीसी अँड कंपनीचे मुख्य कार्यकारी अधिकारी लोव्हेल प्रभू म्हणाले, “हायब्रिड वर्क मॉडेल्सचा वाढता स्वीकार लक्षात घेता, विशेषतः आयटी आणि सेवा क्षेत्रातील लघु व मध्यम उद्योगांना शहराच्या मध्यवर्ती भागात, ‘पे-अॅ्ज-यू-यूज’ मॉडेलवर आधारित लवचिक कार्यालयीन सुविधा अधिक पसंत पडत आहेत. त्यामुळे या क्षेत्राची वाढ अधिक वेगाने होईल.”

को-वर्किंग स्पेस क्षेत्रातील वाढीबाबत माहिती देताना निलेश सुळे म्हणाले की, विविध अग्रगण्य संस्थांनी केलेल्या सर्वेक्षणांनुसार भारतातील एकूण ऑफिस लीजिंगपैकी सुमारे २० टक्के हिस्सा फ्लेक्सी किंवा को-वर्किंग स्पेसचा आहे. जगातील प्रमुख अर्थव्यवस्थांमध्ये हा सर्वाधिक वाटा मानला जातो.

याशिवाय, भारतातील सर्व प्रमुख शहरांमध्ये ग्रेड-ए कार्यालयीन जागेच्या तुलनेत १४ ते १६ टक्के फ्लेक्स स्पेस (को-वर्किंग स्पेस) प्रवेशदरासह पुणे अव्वल स्थानावर असून, या बाबतीत पुण्याने बंगळुरू, मुंबई आणि दिल्ली-एनसीआरलाही मागे टाकले आहे. २०१९ पासून पुण्यातील फ्लेक्सी/को-वर्किंग स्पेस क्षेत्राने ३३ टक्के चक्रवाढ वार्षिक वाढदर नोंदविला असून, तो देशातील सर्वाधिक आहे.

अंदाजे ६० लाख चौरस फूट क्षेत्रात पसरलेल्या ४०० हून अधिक सक्रिय को-वर्किंग किंवा फ्लेक्सी ऑफिस स्पेसेस सध्या पुण्यात कार्यरत आहेत. यापैकी जवळपास ४० टक्के जागेचा वापर आयटी आणि बँकिंग, वित्तीय सेवा व विमा क्षेत्रातील कंपन्यांकडून केला जातो.

सध्या सीसी अँड कंपनीची पुण्यात तीन ठिकाणी केंद्रे असून, त्यामध्ये एकूण ५०० हून अधिक आसनक्षमता उपलब्ध आहे. पुढील दोन वर्षांत पुण्यासह मुंबई, नाशिक, गोवा आणि दुबई येथे विस्तार करून एकूण १,५०० आसनक्षमतेचे जाळे उभारण्याचा कंपनीचा मानस आहे.