Pune Nashik Highway – पुणे-नाशिक राष्ट्रीय महामार्गावर होणारी तीव्र वाहतूक कोंडी आणि नागरिकांची वाढती गैरसोय लक्षात घेऊन प्रशासनाने चिंबळी फाटा परिसरापासून अतिक्रमण विरोधी मोहीम सुरू केली आहे. महामार्गाच्या कडेला असलेल्या अनधिकृत टपऱ्या, पक्के शेड, हॉटेलचे बेकायदेशीर वाढीव भाग आणि पथारी व्यावसायिकांवर जेसीबीच्या साहाय्याने धडक कारवाई करण्यात येत आहे.

गेल्या काही महिन्यांपासून कुरुळी फाटा, बर्गेवस्ती ते चिंबळी फाटा या दरम्यान महामार्गावर रोज मोठ्या प्रमाणावर वाहतूक कोंडी होत होती. चाकण औद्योगिक वसाहतीतील जड वाहने, आयटी कामगार, स्थानिक शेतकरी आणि रुग्णवाहिका देखील या कोंडीत तासन्तास अडकून पडत होत्या.

महामार्गाच्या सेवा रस्त्यांवर आणि पादचारी मार्गांवर दुकानदारांनी केलेल्या अतिक्रमणामुळे रस्ते अरुंद झाले होते. या विरोधात स्थानिक नागरिक आणि उद्योजकांनी तीव्र संताप व्यक्त केला होता. प्रशासनाने शनिवारी (दि. १२) सकाळीच पोलीस दल आणि एमएसएफ जवानांच्या मोठ्या ताफ्यासह चिंबळी फाटा गाठले आणि थेट कारवाईला सुरुवात केली.

अनेक बेकायदेशीर लोखंडी टपऱ्या, प्लास्टिकचे शेड आणि रस्त्यावर लावलेले फलक जप्त करण्यात आले आहेत. काही व्यवसायिकांनी या कारवाईला किरकोळ विरोध करण्याचा प्रयत्न केला, मात्र पोलिसांनी तो मोडून काढत मोहीम सुरूच ठेवली.

पुढील काही दिवस मोहीम सुरूच राहणार
महामार्ग प्राधिकरण आणि स्थानिक प्रशासकीय अधिकाऱ्यांनी दिलेल्या माहितीनुसार, चाकण आणि मोशी परिसरापर्यंत हा महामार्ग पूर्णपणे अतिक्रमणमुक्त केला जाणार आहे. तसेच, रस्त्याच्या कडेला अनधिकृतपणे वाहने पार्क करणाऱ्यांवरही कडक कायदेशीर कारवाई केली जाईल, असा इशारा प्रशासनाने दिला आहे. या धडक मोहिमेमुळे पुणे-नाशिक महामार्गावरील प्रवास आता अधिक सुकर आणि वेगवान होण्याची आशा वाहनचालकांमधून व्यक्त होत आहे. या अतिक्रमण मोहीमे साठी ४५ पोलीस कर्मचारी व नऊ अधिकारी उपस्थित होते.