Pune News : पुणे महापालिकेत विविध पदांवर नोकरी लावण्याचे आमिष दाखवून सुशिक्षित बेरोजगारांची कोट्यवधी रुपयांची फसवणूक केल्याप्रकरणी जेजुरी येथील मार्तंड देवस्थानचा विश्वस्त डॉ. राजेंद्र बबनराव खेडेकर याला शिवाजीनगर पोलिसांनी अटक केली. (Pune News)

न्यायालयाने खेडेकरला तीन ऑक्टोबरपर्यंत पाच दिवसांची पोलिस कोठडी सुनावली. या प्रकरणात आरोपींनी १४ हून अधिक उमेदवारांना बनावट नियुक्तीपत्रे देऊन त्यांच्याकडून जवळपास पावणेतीन कोटी रुपये उकळल्याचे तपासात समोर आले आहे. (Pune News)

या प्रकरणी खेडेकर याच्यासह महापालिकेच्या शिक्षण विभागातील शिपाई शिवानंद बाळासाहेब पाटील आणि अन्य आरोपींविरुद्ध शिवाजीनगर व भारती विद्यापीठ पोलिस ठाण्यात गुन्हा दाखल आहे. महापालिकेच्या सामान्य प्रशासन विभागातील अधीक्षकांनी याबाबत तक्रार दिली आहे. मे २०२२ ते मे २०२५ या कालावधीत महापालिका परिसरासह अन्य ठिकाणी हा प्रकार घडल्याचे तक्रारीत नमूद आहे. (Pune News)

बनावट नियुक्तीपत्रे, ओळखपत्रे तयार

आरोपींनी संगनमत करून महापालिकेचे बनावट लेटरहेड, शिक्के तसेच वरिष्ठ अधिकाऱ्यांच्या बनावट स्वाक्षऱ्यांचा वापर केला. त्याद्वारे उमेदवारांना बोगस नियुक्तीपत्रे, ओळखपत्रे, सेवा पुस्तिका, वैद्यकीय प्रमाणपत्रे आणि वेतनाच्या पावत्या देण्यात आल्या. उमेदवारांचा विश्वास बसावा यासाठी त्यांच्या बँक खात्यात वेतन जमा झाल्याचेही भासविण्यात आल्याचे पोलिस तपासात निष्पन्न झाले आहे.(Pune News)

अटकपूर्व जामीन फेटाळला

गुन्हा दाखल झाल्यानंतर खेडेकर पसार झाला होता. त्याने पुणे सत्र न्यायालयात अटकपूर्व जामिनासाठी अर्ज केला होता. मात्र, न्यायालयाने त्याचा अर्ज फेटाळला. नोकरभरतीतील हा प्रकार सुनियोजित असून, आरोपींची भूमिका, गुन्ह्याची व्याप्ती आणि तपासाची सद्यःस्थिती लक्षात घेता आरोपीची पोलिस कोठडीत चौकशी आवश्यक असल्याचे न्यायालयाने आदेशात नमूद केले होते. (Pune News)

दरम्यान, गुन्ह्याच्या तपासाची व्याप्ती लक्षात घेता खेडेकरची पोलिस कोठडी आवश्यक असल्याचे सांगत शिवाजीनगर पोलिसांनी त्याला न्यायालयात हजर केले. न्यायालयाने त्याला पाच दिवसांची पोलिस कोठडी सुनावली. पुढील तपास वरिष्ठ पोलिस निरीक्षक गिरीश दिघावकर यांच्या मार्गदर्शनाखाली सुरू आहे. (Pune News)

Pune: अंगावर पाणी उडाल्याच्या किरकोळ कारणावरून अल्पवयीन मुलाला मारहाण; संबंधित आरोपी पोलिस असल्याचे निष्पन्न