Pune Metro Fraud – पुणे मेट्रो प्रकल्पासाठी सिमेंट आणि स्टील पुरवठ्याच्या व्यवसायात गुंतवणुकीवर मोठा नफा मिळेल, असे आमिष दाखवून एका दांपत्याची तब्बल ३ कोटी ७८ लाख ६२ हजार रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी लोणी काळभोर पोलिसांनी संतोष सुरेश काकडे आणि अतुल पवार या दोघांविरुद्ध गुन्हा दाखल केला आहे. या संदर्भात प्रिती विनोद जैन (वय ४२, रा. मांजरी बुद्रुक) यांनी फिर्याद दिली आहे. प्रिती जैन या मांजरी येथील कृषितंत्र विद्यालयात कृषी सहाय्यक म्हणून कार्यरत आहेत. पोलिसांनी दिलेल्या माहितीनुसार, २०१९ मध्ये फिर्यादींचे पती विनोद जैन यांची ओळख मांजरी येथील बिल्डिंग मटेरियल पुरवठादार अतुल पवार याच्याशी झाली. पवारच्या माध्यमातून त्यांची ओळख संतोष काकडे याच्याशी झाली. काकडे याने आपण ‘नागार्जुन कन्स्ट्रक्शन कंपनी’ (पुणे मेट्रोचे कंत्राटदार) सोबत करारबद्ध असून मेट्रोला साहित्याचा पुरवठा करत असल्याचे भासवले. विश्वास संपादन करण्यासाठी त्याने सुरुवातीला काही छोटे व्यवहार व्यवस्थित पूर्ण करून नफाही दिला. जैन दांपत्य घर खरेदी करण्याच्या विचारात असताना, आरोपींनी त्यांना घर न घेता व्यवसायात पैसे गुंतवण्यास प्रवृत्त केले. काकडे याने हडपसर येथील त्याचे दुकान, घर आणि काही बनावट कागदपत्रे दाखवून त्यांचा विश्वास अधिक दृढ केला. २६ ऑगस्ट २०२० पासून जैन दांपत्याने कोटींच्या घरात गुंतवणूक करण्यास सुरुवात केली. सप्टेंबर ते डिसेंबर २०२० या कालावधीत त्यांनी सुमारे २ कोटी ५४ लाख रुपये गुंतवले. एकूण व्यवहाराचा आकडा ३ कोटी २१ लाखांच्या पुढे गेला होता. सुरुवातीला १ कोटी ५५ लाख रुपये परत केल्यानंतर, उर्वरित रकमेसाठी आरोपींनी टाळाटाळ सुरू केली. कंत्राटदार नागार्जुन ग्रुपचे ऑडिट सुरू असल्याचे खोटी कारणे देऊन वेळ मारून नेली. रक्कम परत मागितली असता, आरोपींनी जैन दांपत्याला हडपसर पोलीस ठाण्यात सावकारीची खोटी तक्रार करण्याची धमकी देऊन शिवीगाळ केली. मार्च २०२१ ते डिसेंबर २०२४ या काळात केवळ ३३ लाख रुपये परत करण्यात आले, तर उर्वरित मोठी रक्कम आरोपींनी हडपली. अखेर आपली फसवणूक झाल्याचे लक्षात येताच जैन दांपत्याने पोलिसांत धाव घेतली. या प्रकरणाचा पुढील तपास वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली सहाय्यक पोलीस निरीक्षक अरुण जाधव करत आहेत.
