पिंपरी : मावळ तालुक्यातील कुंडमळा येथे पूल कोसळून झालेल्या दुर्घटनेची राज्यासह केंद्र सरकारनेही तातडीने दखल घेतली. पंतप्रधान नरेंद्र मोदी, गृहमंत्री अमित शाह यांनी दुर्घटनेबद्दल शोक व्यक्त केला असून घटनास्थळी मदतकार्याच्या सूचना दिल्या आहेत. तसेच राज्य सरकारही तातडीने मदतकार्यात सहभागी झाले असून असून मुख्यमंत्री देवेंद्र फडणवीस, उपमुख्यमंत्री अजित पवार व अन्य मंत्री यांनीही घटनास्थळाचा आढावा घेतला.

पंतप्रधान मोदींकडून दुःख व्यक्त
पंतप्रधान नरेंद्र मोदी यांनी मुख्यमंत्री देवेंद्र फडणवीस यांच्याकडून घटनेची माहिती घेतली. तसेच आवश्यक ती मदत केंद्र सरकारकडून उपलब्ध करून देण्याचे आश्वासन दिले. यासह दुर्घटनेबद्दल शोक व्यक्त केला.

अमित शाह यांच्याकडून मदतकार्याबद्दल सूचना
गृहमंत्री अमित शाह यांनी राज्याचे मुख्यमंत्री देवेंद्र फडणवीस यांच्याकडून कुंडमळा दुर्घटनेची माहिती घेतली असून बचावकार्यासाठी सर्व यंत्रणांना सहभागी होण्याच्या सूचना दिल्या आहेत. तसेच दुर्घटनेत मृत पावलेल्यांना श्रद्धांजली अर्पण केली आहे.

मुख्यमंत्र्यांकडून मदत जाहीर
कुंडमळा येथील दुर्घटनेत मृत पावलेल्या पर्यटकांच्या कुटुंबीयांना राज्य सरकारकडून ५ लाखांची आर्थिक मदत करण्याचा निर्णय मुख्यमंत्री देवेंद्र फडणवीस यांनी जाहीर केला आहे. तसेच जखमींचा सर्व उपचार खर्च सरकार करेल असेही सांगितले आहे.