शिरूर : हजरत मोहम्मद पैगंबर यांच्या जयंतीनिमित्त खिदमत फाउंडेशन यांच्या वतीने शिरूर येथे मोफत महाआरोग्य शिबिर आणि मोतीबिंदू तपासणी व शस्त्रक्रिया शिबिर आयोजित करण्यात आले आहे.

शनिवार, दि. १३ सप्टेंबर रोजी सकाळी १० ते ३ या वेळेत शिरूर नगरपालिका मंगल कार्यालय येथे हे शिबिर पार पडणार आहे. गरजूंना मोफत चश्म्यांचे वाटप देखील या शिबिरात केले जाणार आहे, अशी माहिती फाउंडेशनचे अध्यक्ष हाजी आसिफ शेख यांनी दिली.

उपाध्यक्ष हाजी फारूक बागवान, सचिव हाजी मुस्ताक शेख, सदस्य हाजी फिरोज बागवान, हाजी आबिद शेख आदी फाउंडेशनचे पदाधिकारी उपस्थित होते.

या शिबिरात नेत्र तपासणी व मोतीबिंदू शस्त्रक्रिया नोंदणी, बालरोग, हाडांचे आजार, ई.सी.जी., मधुमेह, उच्च रक्तदाब, दंतरोग, त्वचारोग आणि स्त्रीरोग तपासणी केली जाणार आहे. डॉ. डी. वाय. पाटील आयुर्वेद हॉस्पिटल अँड रिसर्च सेंटर, आनंदऋषिजी नेत्रालय अहिल्यानगर, मातोश्री मदनबाई धारिवाल हॉस्पिटल आणि रुबी हॉल क्लिनीक, शिरूर यांचे या शिबिरासाठी सहकार्य मिळणार आहे.

शिबिराचे उद्घाटन उद्योगपती प्रकाशभाऊ धारिवाल, खासदार अमोल कोल्हे, आमदार ज्ञानेश्वर कटके, माजी आमदार अशोक पवार, तहसीलदार बाळासाहेब म्हस्के, मुख्याधिकारी प्रीतम पाटील, पोलिस निरीक्षक संदेश केंजळे यांच्यासह विविध पदाधिकाऱ्यांच्या उपस्थितीत होणार आहे.