प्रभात वृत्तसेवा
पुणे – जिल्ह्यातील १४ नगरपरिषदा आणि ३ नगरपंचायतींसाठी निवडणुकीचे चित्र उमेदवारी अर्ज माघारीनंतर पूर्णपणे स्पष्ट झाले आहे. १७ नगराध्यक्षपदासाठी ३४ जणांनी माघार घेतल्याने आता ११९ उमेदवार रिंगणात उरले आहेत. तर, नगरसेवकपदासाठी तब्बल ५७४ इच्छुकांनी माघार घेतल्यामुळे ३९८ जागांसाठी आता १ हजार ५८५ उमेदवार निवडणुकीच्या रिंगणात आहेत.

जिल्ह्यातील 14 नगरपरिषद आणि 3 नगरपंचायतीच्या नगराध्यक्ष पदासाठी 187 जणांनी अर्ज भरले होते, त्यापैकी 153 जणांचे अर्ज वैध ठरले होते आणि नगरसेवक पदासाठी तब्बल 2 हजार 618 जणांनी नामनिर्देशित पत्र भरले होते. त्यापैकी 2 हजार 159 जणांचे अर्ज वैध ठरले होते.

अर्ज माघारी घेण्याच्या दिवशी नगरसेवक पदासाठी अर्ज भरणाऱ्या 574 जणांची माघार घेतली आहे. तर, नगराध्यक्षपदासाठी अर्ज भरलेल्या 34 जणांनी माघार घेतली आहे. यामुळे आता निवडणुकीचे चित्र स्पष्ट झाले आहे. आता, अधिकृत प्रचाराला सुरूवात झाली आहे.