Pune DJ Ban Protest – कर्णकर्कश डीजेच्या वापरामुळे होणाऱ्या ध्वनिप्रदूषणाविरोधात पुणेकरांनी रविवारी (दि. ६) बालगंधर्व चौक ते पुणे महापालिका असा मोर्चा काढत पुन्हा एकदा आंदोलन केले. गेल्या काही दिवसांतील डीजेविरोधी हे तिसरे आंदोलन करण्यात आले. लाउडस्पीकरविरोधी पुणेकर मंचने आयोजित आंदोलनात शहरातील सामाजिक, राजकीय, सांस्कृतिक आणि इतर अनेक क्षेत्रांतील नागरिकांनी मोठ्या संख्येने सहभाग घेतला होता.

ही डीजेबंदी केवळ गणेशोत्सवापुरती मर्यादित नसून, इतरही धार्मिक, जातीय, राजकीय मिरवणुका, विविध उत्सव, जयंती आणि पुण्यतिथींमध्ये होणाऱ्या कर्णकर्कश ध्वनिवर्धकांवरही बंदी घालावी, अशी नागरिकांनी मागणी केली. याबाबत पोलीस आयुक्त, महापालिका आयुक्त आणि महाराष्ट्र प्रदूषण नियंत्रण मंडळाच्या सदस्य सचिवांना निवेदन देण्यात आले.

ध्वनिप्रदूषणाविरोधातील कारवाई ही कार्यक्रम झाल्यानंतर करण्याऐवजी कार्यक्रमाच्या काही तास आधीच करण्याची मागणी केंद्रस्थानी होती. कार्यक्रमस्थळ, साउंड ट्रक उभारण्याची ठिकाणे आणि मिरवणुकीच्या सुरुवातीच्या ठिकाणांची प्रशासनाने पूर्वतपासणी करावी. परवानगीच्या मर्यादेपेक्षा अधिक क्षमतेच्या ध्वनियंत्रणा, अनधिकृत स्पीकर वॉल आणि जनरेटर गर्दी जमण्यापूर्वीच जप्त करावेत,

ध्वनिप्रदूषणाच्या नियमांच्या अंमलबजावणीसाठी पोलीस, महापालिका आणि प्रदूषण नियंत्रण मंडळाची संयुक्त यंत्रणा उभारावी, वॉर्डनिहाय जबाबदार अधिकाऱ्यांची माहिती सार्वजनिक करावी, तसेच अधिकृत संकेतस्थळांवर रिअल-टाइम ध्वनिपातळी उपलब्ध करून द्यावी, अशी मागणीही निवेदनातून करण्यात आली आहे. ध्वनिप्रदूषणासंदर्भातील तक्रारी आणि त्यावर केलेल्या कारवाईची दैनिक माहितीही सार्वजनिक करण्याची मागणी आयोजकांनी केली.

कर्णकर्कश आवाजामुळे लहान मुले, ज्येष्ठ नागरिक, रुग्ण, तसेच प्राणी- पक्ष्यांवर होणाऱ्या परिणामांकडे प्रशासनाने गांभीर्याने पाहावे, अशी भूमिका या वेळी मांडण्यात आली. उत्सवांमध्ये पारंपरिक वाद्ये आणि इतर पर्यायी माध्यमांचा वापर करूनही उत्सव उत्साहात साजरे करता येऊ शकतात, असेही आंदोलनकर्त्यांनी सांगितले. विद्यानंद बापट यांच्यावर झालेल्या हल्ल्याचाही आंदोलनात निषेध करण्यात आला.

एखाद्या व्यक्तीच्या मताशी असहमती असल्यास त्याला विचारांनी उत्तर द्यावे; शारीरिक हल्ला हा निषेधार्ह असल्याची भूमिका आंदोलनकर्त्यांनी मांडली. बापट पुणेकर आहेत किंवा नाहीत, हा मुद्दा महत्त्वाचा नसून ध्वनिप्रदूषणाचा प्रश्न हा व्यापक नागरिक आणि मानवी हक्कांचा प्रश्न असल्याचेही या वेळी सांगण्यात आले. जर नागपूर, सोलापूर, मुंबईमध्ये डीजेवर बंदी होत असताना पुण्यात का नाही, असा सवाल पुणेकरांनी उपस्थित केला.

येत्या आठवड्यात याबाबत निर्णय न झाल्यास पुणे तर पुन्हा नाईलाजाने रस्त्यावर उतरावे लागेल, असा इशाराही मंचचे मुकुंद किर्दत यांनी दिला. या आंदोलनात ॲड. कृणाल घारे, चिंतामणी कांगो, नीता केळकर, डॉ. सिमी आठवले, डॉ. राहुल सावंत, सुदर्शन जगदाळे, उमेश खंदारे, श्रीकांत भिसे, विक्रांत पाटील, अशोक मेहंदळे, आशिष गुंजाळ, कौस्तुभ खांडेकर, समीर बर्डे, मिलिंद केळकर, कीर्ती लिमये, विनोद पवार, तुषार कासार आदींनी सहभाग नोंदवला.