पिरंगुट, (वार्ताहर) – येथील पिरंगुट कँप परिसरातील बालवीर युवक मंडळाने यावर्षी भक्तीरथ हा देखावा सादर केला आहे. पंढरपूर, आळंदी आणि देहू या तीनही तीर्थक्षेत्राचे दर्शन भाविकांना एकाच ठिकाणी घेता येणार आहे. मंडळाचे यंदाचे 38 वे वर्ष असून वार्षिक अहवालाचे प्रकाशन देखील संपन्न झाले, अशी माहिती माजी उपसरपंच व मंडळाचे अध्यक्ष रामदास पवळे व मुळशी तालुका बाजार समितीचे संचालक तुषार पवळे यांनी दिली. मुळशी तालुकास्तरीय आदर्श गणेश मित्र मंडळ प्रथम क्रमांक विजेते, सामाजिक कार्यात नेहमीच अग्रेसर असलेले तसेच नेत्र दीपक देखावे सादर करणारे मंडळ अशी बालवीर युवक मंडळाची ओळख आहे. मंडळाने यावर्षी भक्तिरथ हा देखावा सादर केला आहे. श्री विठ्ठलाची सहा फूट उंच मूर्ती, संत ज्ञानेश्वर महाराज व संत तुकाराम महाराज यांची आकर्षक मूर्ती गणेश भक्तांचे लक्ष वेधून घेत आहे. यावेळी मंडळाने भव्य दिव्य लकी ड्रॉ स्पर्धेचे आयोजन केले असून विजेत्यांस शंभर रुपयात अॅॅक्टिवा दुचाकी, तीस रुपयांत स्मार्ट टीव्ही आणि वीस रुपये कुपनद्वारे स्पोर्ट सायकल जिंकण्याची संधी मिळणार आहे. यावेळी पिरंगुटचे सरपंच चांगदेव पवळे, मुळशी तालुका पोलीस पाटील प्रकाश पवळे, माजी सरपंच रमेश पवळे, सुरेखा पवळे, दिलीप पवळे, व्यापारी संघाचे अध्यक्ष गजानन पवळे, चंद्रकांत धोत्रे, संभाजी पवळे आदी मान्यवर व कार्यकर्ते उपस्थित होते.
