पुणे – दादा आमच्या लक्षात आहे… तुम्ही फक्त विजयाचे पेढे घेऊन या!’ ही प्रतिक्रिया आहे कोथरूडमध्ये मॉर्निंग वॉकसाठी आलेल्या ज्येष्ठ नागरिकांची. कोथरूड विधानसभा मतदारसंघातील महायुतीचे उमेदवार चंद्रकांत पाटील यांनी सकाळी तात्यासाहेब थोरात उद्यानात जाऊन मॉर्निंग वॉकला येणाऱ्या नागरिकांशी संवाद साधला. नागरिकांनीही पाटील यांचे उत्स्फूर्त स्वागत केले.

भाजप कोथरूड दक्षिणचे अध्यक्ष डॉ. संदीप बुटाला, माजी नगरसेविका ॲड. वासंती जाधव, हर्षाली माथवड, भाजपा नेते नवनाथ जाधव, गिरीश भेलके, बाळासाहेब टेमकर, अजित जगताप, दीपक पवार यांच्यासह भाजपाचे अन्य पदाधिकारी याप्रसंगी उपस्थित होते.

भेटणारा प्रत्येक नागरिक पाटील यांना शुभेच्छा देत होता. अनेक नागरिक दादा, तुम्हाला पुन्हा मंत्री व्हायचंय! किंवा तुम्ही कोथरूडच्या घराघरांत पोहोचला आहात, अशा प्रतिक्रिया देत होते. यावर पाटील यांनी हात जोडून कृतज्ञता व्यक्त करून मतदारसंघात मतदानाची टक्केवारी वाढली पाहिजे. सर्वांनी मतदानाचा हक्क अवश्य बजावला पाहिजे, असे आवाहन करीत होते.

आज भाजपाचे महासंपर्क अभियान

कोथरूड विधानसभा मतदारसंघातील भारतीय जनता पार्टीच्या दोन मंडलांतर्फे उद्या (रविवारी) सकाळी महासंपर्क अभियान राबविले जाणार आहे. या अभियानात सुमारे ५० हजार नागरिकांना दोन हजार सर्वस्तरीय कार्यकर्ते जाऊन भेटणार आहेत आणि चंद्रकांत पाटील यांचा प्रचार करणार आहेत. खासदार मुरलीधर मोहोळ यांचाही त्यात समावेश असेल.

सकाळी ८ ते १२ या वेळेत हे महासंपर्क अभियान कोथरूड मतदारसंघातील प्रत्येक प्रभागामध्ये राबविले जाईल. कोथरूड विधानसभा निवडणूक प्रभारी पुनित जोशी यांनी याविषयी अधिक माहिती देताना सांगितले, की पंतप्रधान नरेंद्र मोदी यांच्या १२ नोव्हेंबर रोजी होणाऱ्या सभेचे निमंत्रण या वेळी मतदारांना दिले जाणार आहे.