Pune Cyber Crime- मतदार ओळखपत्रातील माहिती अपडेट करण्याच्या बहाण्याने निवडणूक आयोगाचा अधिकारी असल्याचे भासवून सायबर चोरट्यांनी पुण्यातील दोन ज्येष्ठ नागरिकांची तब्बल १६ लाख ९२ हजार २२ रुपये इतकी आर्थिक फसवणूक केली. येरवडा येथील एका ज्येष्ठ नागरिकाच्या कुटुंबातील दोन बँक खात्यांतून पाच लाख रुपये, तर स्वारगेट परिसरातील एका ज्येष्ठ नागरिकाच्या बँक खात्यातून ११ लाख ९२ हजार २२ रुपये परस्पर काढण्यात आले.

या दोन्ही प्रकरणांत सायबर चोरट्यांनी अवघ्या पाच रुपयांच्या प्रक्रियाशुल्काचा बहाणा करून नागरिकांना जाळ्यात ओढल्याचे समोर आले आहे. येरवडा येथील ब्लू हिल सोसायटीत राहणारे कांजाशेरी वैद्यनाथन व्यंकटेशन (८०) हे टाटा मोटर्समधून सेवानिवृत्त झाले आहेत. सात ऑक्टोबर रोजी एका अनोळखी व्यक्तीने फोन करून आपण निवडणूक आयोगाच्या कार्यालयातून राजीव चंद्रशेखर बोलत असल्याचे सांगितले.

मतदार ओळखपत्र अपडेट करावे लागेल, असे सांगून त्यांना व्हॉट्सॲपवर लिंक पाठविली. तसेच, मतदार ओळखपत्राच्या प्रक्रियेसाठी पाच रुपये शुल्क भरण्यास सांगितले; मात्र व्यवहार पूर्ण झाला नाही, असे सांगत फोन बंद केला. त्यानंतर त्यांच्या पत्नीच्या बँक खात्यातून अडीच लाख रुपये आणि त्यांच्या स्वतःच्या बँक खात्यातून अडीच लाख रुपये असे एकूण पाच लाख रुपये परस्पर हस्तांतरित झाल्याचे त्यांच्या तक्रारीत नमूद आहे.

याप्रकरणी लक्ष्मीनगर पोलीस ठाण्यात तक्रार दाखल करण्यात आली आहे. दुसऱ्या घटनेत स्वारगेट परिसरातील आदिनाथ सोसायटीत राहणारे गिरीश राठीलाला शहा ( ७९) यांना त्यांच्या व्यावसायिक भागीदाराच्या मतदार ओळखपत्रावरील नावात दुरुस्ती करायची होती. त्यासाठी त्यांनी ऑनलाइन अर्ज केला होता. त्यानंतर त्यांना एका अनोळखी व्यक्तीने व्हॉट्सॲपवर संपर्क साधून अर्जातील दुरुस्तीसाठी फॉर्म क्रमांक आठ भरावा लागेल असे सांगत,

प्रक्रियेसाठी पाच रुपये शुल्क भरण्यास सांगितले. शहा यांनी यूपीआयद्वारे शुल्क भरण्याचा प्रयत्न केला असता व्यवहार अयशस्वी झाल्याचे संदेश आला. मात्र, काही वेळाने बँक खात्यातील शिल्लक तपासली असता पंजाब नॅशनल बँकेच्या खात्यातून दोन स्वतंत्र व्यवहारांद्वारे अनुक्रमे चार लाख ९९ हजार ११ रुपये आणि सहा लाख ९३ हजार ११ रुपये, अशी एकूण ११ लाख ९२ हजार २२ रुपयांची रक्कम एनईएफटीद्वारे अन्य खात्यांमध्ये हस्तांतरित करण्यात आली.

नागरिकांनी घ्यावी खबरदारी!
मतदार ओळखपत्र अपडेट करण्यासाठी अनोळखी व्यक्तीने पाठविलेल्या लिंकवर क्लिक करू नये. व्हॉट्सॲपवरून आलेल्या एपीके फाइल डाउनलोड करू नयेत. निवडणूक आयोगाच्या नावाने फोन आल्यास अधिकृत संकेतस्थळावरून माहितीची खातरजमा करावी. बँक खात्यातून अनधिकृत व्यवहार झाल्याचे लक्षात येताच तातडीने १९३० या राष्ट्रीय सायबर गुन्हे हेल्पलाइनवर संपर्क साधावा.