Pune Crime – पुणे तेथे काय उणे, असे म्हणतात ते उगाच नाही. शहरात एखादी किरकोळ घटना कधी मोठ्या वादात रूपांतरित होईल, याचा नेम नाही. अशाच घडलेल्या एका वेगळ्याच प्रकाराने नागरिकांचे लक्ष वेधून घेतले आहे. लव्हबर्ड (पोपट) आणि मांजरातील वाद अखेर दोन शेजाऱ्यांमधील हाणामारीपर्यंत पोहोचला आणि प्रकरण थेट पोलिस ठाण्यापर्यंत गेले. पोलिसांच्या माहितीनुसार, ही घटना ताडीवाला रोड परिसरातील भारत मित्र मंडळासमोर ८ मार्चला घडली. याप्रकरणी मांजर पाळणारे दिनेश रंगराव पोताबत्तोनी यांच्याविरुद्ध पोलीस ठाण्यात बीएनएसचे कलम ११८ (१) नुसार गंभीर मारहाणीचा गुन्हा दाखल केला आहे. अभिषेक सिंग हे कुटुंबासह ताडीवाला रोड परिसरात वास्तव्यास आहेत. त्यांनी घरात लव्हबर्ड्स (छोटे पोपट) पाळले असून त्यांचा पिंजरा घरासमोर ठेवलेला असतो. शेजारी राहणारे दिनेश पोताबत्तोनी यांनी मांजर पाळले आहे. हे मांजर परिसरात मोकळेपणाने फिरत असल्याने ते वारंवार सिंग यांच्या घरासमोरील लव्हबर्ड्सच्या पिंजऱ्याभोवती फिरत असे. काही वेळा मांजरीने पिंजरा ढकलल्याचाही प्रकार घडल्याने सिंग कुटुंबीय त्रस्त झाले होते. याबाबत त्यांनी पोताबत्तोनी यांना मांजरीवर लक्ष ठेवण्यास सांगितले. मात्र याच कारणावरून दोन्ही शेजाऱ्यांमध्ये वाद सुरू झाला. वाद वाढत गेला आणि काही वेळातच दोन्ही कुटुंबीय रस्त्यावर आले. एकमेकांना शिवीगाळ, धक्काबुक्की करत हा वाद हाणामारीपर्यंत पोहोचला. या मारहाणीत अभिषेक सिंग यांना दुखापत झाली. दरम्यान, पोताबत्तोनी यांच्या आईने आमची मांजर त्यांच्या पोपटांकडे गेली का हे आम्हाला माहिती नाही. त्यांच्या घरीही मांजर आहेत. मुक्या प्राण्यांचा वाद माणसांमध्ये वाढला, असे सांगितले. घटनेनंतर अभिषेक सिंग यांनी पोलीस ठाण्यात धाव घेऊन तक्रार दाखल केली. त्यानुसार मांजरीच्या मालकाविरुद्ध गुन्हा नोंद झाला आहे.
