पुणे – पत्नीने घटस्फोट घेऊन दुसरे लग्न केल्याचा राग मनात धरून पहिल्या पतीने आपल्या साथीदाराला सोबत घेऊन पत्नीच्या दुसर्‍या पतीवर खूनी हल्ला केला. धारधार हत्याराने केलेल्या हल्ल्यात त्याचा जागीच मृत्यू झाला. सोनल उर्फ सुमीत पटेकर (रा.पवळे चौक कसबा पेठ) असे खून झालेल्या व्यक्तीचे नाव आहे.

याप्रकरणी, प्राजक्त सोनल उर्फ सुमित पटेकर (वय.34,रा. कसबा पेठ) यांनी फरासखाना पोलिस ठाण्यात फिर्याद दिली आहे. त्यानुसार पोलिसांनी सनि राजेंद्र मारटकर (रा.खडकी गवळी आळी) आणि त्याच्या साथीदारावर खून, खूनाचा प्रयत्नाचा गुन्हा दाखल केला आहे.

आरोपींच्या हल्ल्यात प्राजक्ता ह्या देखील गंभीर जखमी झाल्या आहेत. ही घटना 1308 अग्रवाल प्राईड, तिसरा मजला, फ्लॅट नंबर 07 पवळे चौक कसबा पेठ येथे गुरूवारी (दि.6) दुपारी अडीच वाजताच्या सुमारास घडली आहे.

पोलिसांनी दिलेल्या माहितीनुसार, आरोपी सनि हा फिर्यादी महिलेचा पहिला पती आहे. दोघांचा घटस्फोट झाला आहे. घटस्फोटानंतर प्राजक्त यांनी सोनल उर्फ सुमित याच्यासोबत विवाह केला आहे. त्याचा राग आरोपी सनि याच्या डोक्यात होता. त्यातूनच सनि याने आपल्या एका साथीदाराला सोबत घेऊन दुपारी अडीच वाजताच्या सुमारास महिलेच्या कसबा पेठेतील घरात घुसला. त्यावेळी फिर्यादी महिला, त्यांची सासू आणि पती गप्पा मारत बसले होते.

काही कळण्याच्या आतच सनि आणि त्याच्या साथीदाराने धारधार शस्त्राने सुमीत याच्यावर खूनी हल्ला केला. त्याच्या डोक्यात, तोंडावर आणि हातावर वार करण्यात आले. हा प्रकार पाहून फिर्यादींनी पती सुमीत याला वाचविण्याचा प्रयत्न केला असता, त्यांच्यावर देखील सनि याने डोक्यात आणि हातावर वार करून जीवे ठार मारण्याचा प्रयत्न केला. गंभीर जखमी झाल्याने सुमीत याचा जागीच मृत्यू झाला.