पुणे – पहिले लग्न झाले असताना ते लपवून ठेवत वंशाला दिवा मिळावा म्हणून मांत्रिकांच्या मदतीने अघोरी कृत्य करून दोन उच्चशिक्षीत सुनांचा शारिरीक व मानसिक छळ केल्याचा धक्कादायक प्रकार समोर आला आहे. याप्रकरणी, बांधकाम व्यवसायिक सुर्यकांत काकडे, कृष्णा गुरूजी यांच्यासह 9 जणांविरुद्ध कोथरुड पोलिसांनी जादुटोणाविरोधी कायद्यानुसार दोन वेगवेगळे गुन्हे दाखल केले आहेत.

याप्रकरणी, कोंढवा परिसरात राहणाऱ्या दोघा जुळ्या बहिणींनी कोथरुड पोलिस ठाण्यात फिर्याद दिली आहे. त्यानुसार सूर्यकांत दत्तात्रय काकडे, कविता सूर्यकांत काकडे, जय सूर्यकांत काकडे, विजय सूर्यकांत काकडे, अजय सूर्यकांत काकडे (सर्व रा. सर्वत्र सोसायटी, कृष्णा हॉस्पिटलजवळ, कोथरुड), अश्विनी पुजारी, सुशांत पवार आणि कृष्णा गुरुजी यांच्यावर गुन्हा दाखल करण्यात आला आहे. हा प्रकार 14 मे ते 24 डिसेंबर 2021 दरम्यान सर्वत्र सोसायटीत घडला आहे. दोघाही बहिणींनी दोन वेगवेगळ्या तक्रारी दिल्या आहेत.

पोलिसांनी दिलेल्या माहितीनुसार, सूर्यकांत काकडे हे प्रसिद्ध बांधकाम व्यावसायिक आहेत. तर दोन्ही सुनांनी परदेशात शिक्षण घेतले आहे. काकडे यांना मुलगा विजय व जय अशी दोन जुळी मुले आहेत. या दोघांचे पूर्वी लग्न झाले असतानाही ते लपवून ठेवून फिर्यादी असलेल्या दोघा जुळ्या बहिणींशी लग्न लावले होते. लग्न झाल्यानंतर मुलगा व्हावा, म्हणून फिर्यादी व तिचे बहिणीला कृष्णा गुरुजी याने मंत्रून दिलेल्या पावडरचे अस्वच्छ, बेचव व काळे पिण्यास भाग पडले. तसेच त्यांच्या बेडखाली मंत्र -तंत्र करुन आणलेले व फिर्यादीचे नाव लिहिलेले लिंबु ठेवून त्यांना वश करण्याचा प्रयत्न केला.

फिर्यादींच्या संमतीशिवाय नकळत अश्‍लिल व्हिडिओ शुटींग केले. ते सोशल मीडियावर व्हायरल करण्याची फिर्यादीचे वडिलांना दिली. तसेच धमकी देऊन आमची कोठेही तक्रार करायची नाही, आमचे संबंध छोटा राजनशी आहेत, राजकीय संबंधवरपर्यंत आहेत. आमच्या नादी लागू नका. नादी लागला तर कोठे गाडून टाकेन, ते कोणाला शोधूनदेखील सापडायचे नाही, अशी जीवे ठार मारण्याची धमकी दिली. वेगवेगळी पत्रे पाठवून त्यामध्ये फिर्यादी व तिचे बहिणीवर खोटे व चुकीचे आरोप करुन त्यांची बदनामी केली, असे फिर्यादीत नमूद केले आहे. त्यानुसार पोलिसांनी गुन्हा दाखल केला असून, तपास सुरू असल्याची माहिती वरिष्ठ पोलिस निरीक्षक महेंद्र जगताप यांनी दिली.