Pune Crime : ‘तुला मुलगा होत नाही,’ असे म्हणत पत्नीला लाथाबुक्क्यांनी मारहाण करून गळा दाबत जीवे मारण्याचा प्रयत्न केल्याप्रकरणी मांजरी पोलिस ठाण्यात कार्यरत पोलिस उपनिरीक्षकासह त्याच्या आईविरुद्ध गुन्हा दाखल करण्यात आला आहे. तसेच बेकायदेशीरपणे गर्भलिंग निदान करून गर्भात मुलगी असल्याचे समजल्यानंतर पत्नीवर गर्भपातासाठी दबाव टाकल्याचा आरोपही तक्रारीत करण्यात आला आहे.

धनाजी रंगराव टोणे आणि अनसूया रंगराव टोणे (रा. पी. एस. व्हिला, शेवाळेवाडी, हडपसर) अशी गुन्हा दाखल झालेल्यांची नावे आहेत. याबाबत टोणे यांच्या पत्नीने मांजरी पोलिस ठाण्यात फिर्याद दिली आहे. गुन्हा दाखल झाल्यानंतर धनाजी टोणे सुट्टीवर गेल्याची माहिती वरिष्ठ पोलिस अधिकाऱ्यांनी दिली.

पोलिसांनी दिलेल्या माहितीनुसार, धनाजी टोणे आणि फिर्यादी महिलेचा विवाह १९ मे २०१९ रोजी झाला. लग्नानंतर अवघ्या दोन महिन्यांनी टोणे याने पत्नीचा मानसिक आणि शारीरिक छळ करण्यास सुरुवात केल्याचा आरोप आहे. ‘तू नोकरी कर, कमव’ असे म्हणत शिवीगाळ आणि मारहाण केली जात असल्याचे तक्रारीत नमूद आहे.

२०२० मध्ये पत्नी गर्भवती असतानाही तिला दर तीन-चार दिवसांनी मारहाण केली जात होती. सात महिन्यांची गर्भवती असताना तिच्या अंगावर बसून मारहाण केल्याचा आरोपही महिलेने केला आहे. मे २०२५ मध्ये धनाजी टोणे आणि त्यांची आई अनसूया यांनी महिलेच्या इच्छेविरुद्ध गर्भलिंग तपासणी केल्याचे तक्रारीत म्हटले आहे.

गर्भात मुलगी असल्याचे समजल्यानंतर दोघांनी गर्भपात करण्यासाठी तिच्यावर दबाव टाकला. गर्भपात न केल्यास दोन्ही मुलींना घेऊन माहेरी जाण्याची धमकी दिल्याचाही आरोप आहे. त्यानंतर महिलेचा जबरदस्तीने गर्भपात करण्यात आल्याचे तक्रारीत नमूद आहे. दरम्यान, कोजागिरी पौर्णिमेच्या दिवशी धनाजी टोणे यांनी पत्नी आणि मुलीच्या अंगावर उकळते दूध फेकण्याचा प्रयत्न केल्याचाही आरोप महिलेने केला आहे. या प्रकरणाचा पुढील तपास मांजरी पोलिस करीत आहेत.