प्रभात वृत्तसेवा
पुणे – गणेशोत्सवाच्या पार्श्वभूमीवर कात्रज भागातील तीन सराईत गुन्हेगारांना शहर आणि जिल्ह्यातून तडीपार करण्याचे आदेश परिमंडळ दोनचे पोलीस उपायुक्त मिलिंद मोहिते यांनी दिले.अभय उर्फ सोन्या अशोक निसर्गंध (वय २०, रा. सिद्धीविनायक कॉलनी, आंबेगाव खुर्द), विनोद दिलीप धरतीमगर (वय २२, रा. आंबेगाव बुद्रुक), प्रथमेश उर्फ अभय देविदास कुडले (वय २१, रा. दत्तनगर, आंबेगाव बुद्रुक) अशी तडीपार केलेल्या गुंडांची नावे आहेत.

तिघांना पुणे शहर, जिल्ह्यातून दोन वर्षांसाठी तडीपार करण्याचे आदेश देण्यात आले आहेत. निसर्गंध, धरतीमगर, कुडले विरुद्ध भारती विद्यापीठ आणि आंबेगाव पोलीस ठाण्यात गंभीर स्वरुपाचे गुन्हे दाखल आहेत. तिघांना शहर आणि जिल्ह्यातून तडीपार करण्याचा प्रस्ताव आंबेगाव पोलीस ठाण्याचे वरिष्ठ पोलीस निरीक्षक शरद झिने यांनी तयार केला होता. संबंधित प्रस्ताव पोलीस उपायुक्त मिलिंद मोहिते यांच्याकडे पाठविण्यात आला होता. या प्रस्तावाला माेहिते यांनी मंजुरी देऊन तिघांना शहर आणि जिल्ह्यातून तडीपार करण्याचे आदेश दिले.