Pune Crime – दारू आणि गांजा पित असल्याची माहिती त्याच्या आईला सांगितल्याच्या रागातून पुणे रेल्वे पोलिस कर्मचाऱ्यावर धारदार चाकूने गळ्यावर व छातीवर वार करून, डोक्यात दगड घालून जिवे मारण्याचा प्रयत्न करण्यात आला. त्यानंतर त्याच्याकडील मोबाईल आणि सोन्याची चैन जबरदस्तीने लुटून नेण्यात आली. या प्रकरणी बंडगार्डन पोलिसांनी अवघ्या काही तासांत चौघांना ताब्यात घेतले. त्यापैकी दोघे विधिसंघर्षित बालक असल्याचे तपासात निष्पन्न झाले आहे.

अक्षय माधव बोंबाले (वय २८, रा. पुणे गेस्ट हाऊस, बुधवार पेठ) हे पुणे रेल्वे पोलिस ठाण्यात कार्यरत आहेत. सोमवारी (७ सप्टेंबर) रात्री साडेआठच्या सुमारास ड्युटी संपवून घरी जात असताना ससून रुग्णालयाच्या मागील बाजूस, उपविभागीय पोलिस अधिकारी रेल्वे कार्यालयासमोरील रस्त्यावरील फुटपाथजवळ चार आरोपींनी त्यांची दुचाकी अडवली.

आरोपींनी बोंबाले यांच्या आईला ते दारू आणि गांजा पित असल्याचे सांगितले होते. याचा राग मनात धरून आरोपींनी बोंबाले यांच्यावर धारदार चाकूने हल्ला केला. त्यांच्या गळ्यावर व छातीवर वार केले, तसेच डोक्यात दगड घालून गंभीर जखमी केले. त्यानंतर त्यांच्याकडील वनप्लस कंपनीचा मोबाईल आणि सोन्याची चैन जबरदस्तीने घेऊन आरोपी पसार झाले.

या घटनेनंतर बंडगार्डन पोलिस ठाण्यात भारतीय न्याय संहितेच्या कलम १०९(१), ३०९(६), ३५१(२), ३५२, ३(५) तसेच महाराष्ट्र पोलिस अधिनियमातील संबंधित कलमांनुसार गुन्हा दाखल करण्यात आला. घटनेचे गांभीर्य लक्षात घेऊन वरिष्ठ पोलिस निरीक्षक संतोष पांढरे यांनी दोन तपास पथके तयार केली.

पोलिसांनी तांत्रिक विश्लेषण आणि परिसरातील सीसीटीव्ही फुटेजच्या आधारे आरोपींचा माग काढण्यास सुरुवात केली. दरम्यान, पोलिस अंमलदार ज्ञानेश्वर गायकवाड यांना आरोपी नाना पेठ परिसरात लपून बसल्याची माहिती मिळाली. त्यानुसार पोलिस उपनिरीक्षक गणेश चव्हाण यांच्या पथकाने नाना पेठेत शोधमोहीम राबवून चौघांना ताब्यात घेतले.

तपासात आरोपींपैकी दोघे विधिसंघर्षित बालक असल्याचे समोर आले. रॉकी रंजीत पात्री (२४) आणि विशाल ऊर्फ विकी रणजित पात्रौ (२०, दोघे रा. रेल्वे कॉटर्स, पुणे स्टेशन) यांना ८ सप्टेंबर रोजी अटक करण्यात आली. न्यायालयाने त्यांना १३ सप्टेंबरपर्यंत पोलिस कोठडी सुनावली आहे. तर दोन्ही विधिसंघर्षित बालकांना बाल न्याय मंडळासमोर हजर केले असता, आदेशानुसार त्यांची येरवडा येथील निरीक्षणगृहात रवानगी करण्यात आली.

या प्रकरणाचा पुढील तपास पोलिस उपनिरीक्षक गणेश चव्हाण करीत आहेत. वरिष्ठ पोलिस निरीक्षक संतोष पांढरे, पोलिस निरीक्षक (गुन्हे) विनोद सलगरकर यांच्या मार्गदर्शनाखाली पोलिस उपनिरीक्षक राहुल पवार, गणेश चव्हाण, प्रदीप शितोळे, सारस साळवी, प्रकाश आव्हाड, ज्ञानेश्वर गायकवाड, महेश जाधव, मनोज भोकरे, शिवाजी सरक आणि अनिकेत माने यांच्या पथकाने ही कारवाई केली.