Pune Court – पत्नीच्या गर्भधारणेविषयी शंका घेऊन तिचा शारीरिक व मानसिक छळ करणाऱ्या २८ वर्षीय पतीला न्यायालयाने एक वर्षे कारावास आणि आठ हजार रुपये दंडाची शिक्षा सुनावली. पत्नीच्या चारित्र्यावर वारंवार संशय घेणे, गर्भातील बाळाच्या पितृत्वावर प्रश्नचिन्ह उपस्थित करणे, दुसऱ्या महिलेशी विवाहाची इच्छा व्यक्त करणे, समाजात बदनामीची धमकी देऊन सातत्याने अपमान व छळ करणे, असे वर्तन वैवाहिक मतभेदांच्या पलिकडे जाऊन क्रूरता ठरते.

अशा वर्तनामुळे महिलेची प्रतिष्ठा, सामाजिक सन्मानाला आणि मानसिक आरोग्याला गंभीर धक्का पोहोचतो, असे निरीक्षण नोंदवित प्रथमवर्ग न्यायदंडाधिकारी नरेश बारी यांनी हा निकाल दिला. जून ते ऑक्टोबर २०१७ दरम्यान घडलेल्या घटनेबाबात पीडितेने येरवडा पोलिसात तक्रार दिली होती. पीडिता आणि आरोपीचा विवाह जून २०१७ मध्ये हडपसरला थाटामाटात झाला.

मुलीच्या वडिलांनी लग्नात १० तोळे सोन्याचे दागिने दिले. तब्बल २० ते २५ लाख रुपये खर्च केला. लग्नाला अवघे दोन आठवडे झाले असताना, पत्नीला पतीच्या मोबाईलवर एका महिलेसमवेत चॅटिंग आढळले. त्यामध्ये आणखी एका मुलीचा उल्लेख होता. त्याबाबत, पत्नीने विचारणा केली असता, पतीने वैयक्तिक गोष्टीत ढवळाढवळ करू नको, असे सांगत धमकावले.

काही दिवसांनी पत्नी गरोदर राहिली असता, पतीने तिच्या चारित्र्यावर आणि गर्भाच्या पितृत्वावर संशय घेऊन तिच्या इच्छेविरोधात गर्भपात केल्याचे फिर्यादीत म्हटले आहे. पोलीस उपनिरीक्षक अनिल लोहार यांनी या प्रकरणाचा तपास केला. या खटल्यात सरकारी वकील योगेश कदम यांनी काम पाहिले.