Pune News : पुणे महानगरपालिकेत नोकरी लावून देण्याचे आमिष दाखवत बनावट लेटरहेड, बनावट शिक्के आणि वरिष्ठ अधिकाऱ्यांच्या खोट्या स्वाक्षऱ्यांच्या आधारे तब्बल 45 लाखांची फसवणूक केल्याप्रकरणी शिवाजीनगर पोलीस ठाण्यात मनपा शिपायासह तिघांविरुद्ध गंभीर कलमांखाली गुन्हा दाखल करण्यात आला आहे. (Pune News)

याप्रकरणी शलाका विनायक घोगे (वय 49, रा. बाणेर-सुस रोड) यांनी सरकारतर्फे तक्रार दिली आहे. त्यानुसार मनपा शिपाई शिवानंद बाळासाहेब पाटील (शिक्षण विभाग, सध्या खाशाबा जाधव क्रीडा निकेतन, शाळा क्र. 80 बी, टिळक रोड), नमिता गोवर्धन बनसोडे, राजेंद्र बबन खेडेकर आणि त्यांच्या इतर साथीदारांविरुद्ध गुन्हा दाखल करण्यात आला आहे. (Pune News)

पोलिसांनी दिलेल्या माहितीनुसार, मार्च 2022 पासून ते 17 जुलै 2026 पर्यंत आरोपींनी पुणे महानगरपालिकेचे बनावट लेटरहेड, बनावट शिक्के आणि वरिष्ठ अधिकाऱ्यांच्या खोट्या स्वाक्षऱ्यांचा वापर करून विविध विभागांमध्ये नोकरी लावून देण्याचे आमिष नागरिकांना दाखवले. त्यासाठी बनावट नियुक्तीपत्रे तयार करून अर्जदारांकडून मोठ्या प्रमाणात पैसे उकळण्यात आले. (Pune News)

या प्रकरणात धम्मचंद्र अरुण देवकांत यांची तब्बल 45 लाख रुपयांची फसवणूक झाल्याचे तपासात समोर आले आहे. तसेच इतर अनेक नागरिकांकडूनही रोख रक्कम आणि धनादेशाद्वारे पैसे घेऊन त्यांचीही आर्थिक फसवणूक केल्याचा संशय व्यक्त करण्यात आला आहे. (Pune News)

शिवाजीनगर पोलीस ठाण्यात गुन्हा क्रमांक 185/2026 नोंद करण्यात आला असून भारतीय न्याय संहितेतील विविध गंभीर कलमांनुसार गुन्हा दाखल करण्यात आला आहे. या प्रकरणाचा पुढील तपास पोलीस करत असून आणखी फसवणूकग्रस्त समोर येण्याची शक्यता व्यक्त करण्यात येत आहे. (Pune News)

Pune District : शिरुर तालुक्यात कायदा-सुव्यवस्थेचे धिंडवडे; करड्यात आठ जणांकडून तरुणावर गोळीबार