Pune Congress – पुण्यातील वाहतुकीची समस्या अधिक गंभीर बनत असून, त्यासाठी विचारविनिमय करून मार्ग शोधण्यासाठी पुणे शहर जिल्हा काँग्रेस कमिटीतर्फे शनिवारी (दि. ६) सकाळी १० ते दुपारी १ या वेळेत नवी पेठेतील पत्रकार भवन येथे पुणे ट्रॅफिक परिषदेचे आयोजन करण्यात आले आहे. यामध्ये वाहतूकसंबंधी विविध संस्थांचे वरिष्ठ अधिकारी, तज्ज्ञ, पत्रकार, नागरिक सहभागी होणार आहेत.

या परिषदेतील शिफारसी व निष्कर्ष यांचा एकत्रित अहवाल तयार करून त्याची अंमलबजावणी व्हावी, यासाठी हा अहवाल महाराष्ट्राचे मुख्यमंत्री आणि पुणे महापालिका आयुक्तांना सादर करून त्याचा पाठपुरावा केला जाईल. ट्रॅफिक परिषदेतील सहभागी वरिष्ठ शासकीय अधिकारी व तज्ज्ञ यांच्या चर्चेचा गोषवारा व शिफारसी यावर आधारित पुस्तक प्रकाशित केले जाणार आहे,

असेही पुणे शहर काँग्रेसच्या पश्चिम विभागाच्या अध्यक्षा दीप्ती चवधरी यांनी स्पष्ट केले आहे. या परिषदेत अपर पोलीस आयुक्त मनोज पाटील, पोलीस उपायुक्त (वाहतूक) संदीप भाजीभाकरे, प्रादेशिक परिवहन अधिकारी अर्चना गायकवाड, महापालिका पथविभाग प्रमुख रोहितदास गव्हाणे, मुख्य अभियंता (प्रकल्प) दिनकर गोजारे,

पुणे मेट्रोचे प्रोजेक्ट डायरेक्टर अतुल गाडगीळ, सीआयआरटीचे तांत्रिक विभाग प्रमुख एस. एन. ढोले, पीएमआरडीए व पीएमपीएमएलचे अधिकारी, सजग नागरिक मंचाचे विवेक वेलणकर यांना निमंत्रित करण्यात आले आहे. हे सर्वजण सहभागी होऊन विविध उपाययोजनांबाबत मार्गदर्शन करतील, असे दीप्ती चवधरी यांनी सांगितले.