पदवीधरसाठी दुरंगी, तर शिक्षकसाठी होणार तिरंगी लढत
Pune: विधानपरिषदेच्या पुणे विभाग पदवीधर आणि शिक्षक मतदारसंघाच्या निवडणुकीचा प्रचार बुधवारी संपला. या दोन्ही निवडणुकीसाठी शुक्रवारी (दि. २३) मतदान होत आहे.

पदवीधर मतदारसंघासाठी भाजपच्या डाॅ. स्मिता जाधव आणि राष्ट्रवादी काँग्रेस शरदचंद्र पवार पक्षाच्या हर्षदा देशमुख-जाधव यांच्यात थेट लढत होत आहे. शिक्षक मतदारसंघासाठीची निवडणूक तिरंगी होणार असून, भाजपचे उमेदवार कौस्तुभ गावडे, काँग्रेसचे विद्यमान आमदार जयंत आसगावकर आणि शिवसेनेचे उमेदवार सचिन सानप यांच्या लढत होत आहे.

ही निवडणूक महायुती विरुद्ध महाविकास आघाडीत थेट होईल, अशी चिन्हे होती. मात्र, शिक्षक मतदारसंघासाठी शिवसेना (शिंदे गट) यांच्याकडून उद्योगमंत्री उदय सामंत यांचे स्वीय सहायक सचिन सानप यांनी अर्ज भरला. सानप हे शिवसेनेचे अधिकृत उमेदवार असल्याचे पक्षाने जाहीर केले. त्यामुळे महायुतीमधील घटक पक्ष असलेला शिवसेनेने उमेदवार दिल्याने या निवडणुकीत अधिक रंगत आली आहे.

या दोन्ही महत्त्वाच्या मतदारसंघांसाठी भाजपने आपली पूर्ण ताकद लावली आहे. खुद्द मुख्यमंत्री देवेंद्र फडणवीस यांनी पुण्यात विशेष बैठक घेऊन पक्षाचे आमदार, शहर- ग्रामीण भागातील पदाधिकारी आणि दोन्ही पालिकांमधील नगरसेवकांना निवडणुकीच्या कामाला लावले होते. दुसरीकडे महाविकास आघाडीनेही मेळावे घेत प्रचाराचा नारळ फोडला.

याशिवाय स्थानिक पदाधिकाऱ्यांच्या संयुक्त बैठका आणि शैक्षणिक संस्थांच्या प्रतिनिधींच्या भेटीगाठींवर भर दिला. आता जाहीर प्रचार समाप्त झाला असला, तरी छुपा प्रचार सुरूच राहणार आहे.