पुणे – 26 ठेवीदारांची फसवणूक केल्याप्रकरणी न्यायालयीन कोठडीत असलेले बांधकाम व्यावसायिक दीपक कुलकर्णी (डीएसके) यांच्या बंगल्यात चोरी केल्या प्रकरणात एका आरोपीचा जामीन अर्ज न्यायालयाने फेटाळला. प्रथमवर्ग न्यायदंडाधिकारी एस. व्ही. निमसे यांनी हा आदेश दिला.

सुरेश शंकर धोत्रे (वय 43, ता. दीप बंगलाचौक) असे त्याचे नाव आहे. तर सूरज ऊर्फ चिपाली, फॅन्ड्री, लाला, विशाल विटकर यांच्याविरोधात गुन्हा दाखल आहे. याबाबत भाग्यश्री अमित कुलकर्णी (वय 37, रा. गणेशखिंड रस्ता, औंध) यांनी चतुःश्रृंगी पोलिस ठाण्यात फिर्याद दिली आहे. ऑक्‍टेंबर 2019 ते ऑक्‍टोंबर 2021 दरम्यान ही चोरी झाली.

या चोरीत टीव्ही, म्युझिक सिस्टिम, प्रोजेक्‍टर, पिठाची गिरणी, एसी, गिझर असा सहा लाख 95 हजार रुपयांचा मुद्देमाल चोरीला गेला होता, असे फिर्यादीत नमूद आहे. आरोपीची न्यायालयीन कोठडीत रवानगी झाल्यानंतर त्याने जामिनासाठी अर्ज केला होता. या अर्जास सहायल सरकारी वकील विशाल मुरळीकर यांनी विरोध केला.

अटक आरोपी हा सराईत गुन्हेगार असून त्याच्यावर चोरी, मारहाण असे गंभीर गुन्हे दाखल आहेत. गुन्ह्यातील इतर आरोपींचा शोध घ्यायचा असून चोरीला गेलेला मुद्देमाल जप्त करायचा आहे. आरोपीस जामीन तो पुढील तपासासाठी हजर राहण्याची शाश्‍वती नाही. त्यामुळे त्याचा जामीन फेटाळण्यात यावा, असा युक्तिवाद ऍड. मुरळीकर यांनी केला.