पुणे – व्होडाफोन कंपनीचे ५४ लाख ५४ हजाराचे लाइन कार्ड दोघा कर्मचाऱ्यांनी भंगारामध्ये अवघ्या चार लाखांत विकले. हे कार्ड दिल्लीतील एका भंगार व्यवसायिकाला विकण्यात आले होते. कर्ज फेडण्यासाठी एका कर्मचाऱ्याने हा प्रकार केला. याप्रकरणी कंपनीच्या दोघा कर्मचाऱ्यांसह तिघांवर स्वारगेट पोलिस ठाण्यात गुन्हा दाखल झाला आहे. त्यांनी विकलेला माल दिल्ली येथून हस्तगत करण्यात आला. कंपनीचा सुरक्षा रक्षक भरमुबिरप्पा पुजारी (३९, रा. जांभूळवाडी रोड कात्रज), टेक्निशियन दीपक मुरलीधर तड़के (४८, रा. नागपूर चाळ, येरवडा) यांनी आपसांत संगनमत करून सदर लाइनकार्ड हे प्रीतमकुमार कामताप्रसाद कमल (३२, रा. कोल्हेवाडी, खडकवासला) याला विकले होते. गुन्हा दाखल झाल्यावर सहायक पोलीस निरीक्षक प्रशांत संदे, तसेच तपास पथकातील पोलीस अंमलदार यांनी वेगा सेंटर चौक स्वारगेट येथील ऑफीस व परिसरातील सीसीटीव्ही फुटेज तपासले. तांत्रिक विश्लेषणाद्वारे मिळालेल्या माहितीच्या आधारे पुजारी आणि तडके यांचा सहभाग आढळून आला. त्यांना पोलिसी खाक्या दाखवल्यावर त्यांनी कमलला कार्ड विकल्याचे सांगितले. कमलने ते दिल्लीत एका भंगार व्यावसायिकाला चार लाखांत विकले होते. त्याने तेथून ते बंगळुरूला पाठवले होते. दिल्लीतील व्यवसायिकाला ते परत मागविण्यास सांगून हस्तगत करण्यात आले. ही कामगिरी उपायुक्त स्मार्तना पाटील, सहायक आयुक्त नंदिनी वग्यानी यांच्या मार्गदर्शनाखाली वरिष्ठ पोलीस निरीक्षक दिलीप फुलपगारे, सहायक पोलीस निरीक्षक प्रशांत संदे, उपनिरीक्षक येवले व पोलीस अंमलदार संदीप घुले, सोमनाथ कांबळे, अनिस शेख, सुजय पवार, शिवा गायकवाड, फिरोज शेख, रमेश चव्हाण, दीपक खंदाड, प्रवीण गोडसे यांनी केली आहे.
