पुणे : कामावरुन कमी केल्याच्या रागातून टेलरिंग दुकानातील कामगाराने मालकिणीच्या अंगावर पेट्रोल टाकून तिला पेटवून दिल्याची धक्कादायक घटना वडगाव शेरी भागात घडली. या घटनेत मालकिणीसह तिला पेटवून देणाऱ्या कामगाराचा होरपळून मृत्यू झाला. या घटनेत एक जण जखमी झाला आहे. कामगार मिलींद गोविंदराव नाथसागर (वय ३५) आणि दुकान मालकिण बाला नोया जोनिंग (वय ३२ रा. मांदळे निवास, रामचंद्र सभागृहाजवळ, वडगाव शेरी) अशी मृत्युमुखी पडलेल्यांची नावे आहेत. या घटनेत प्रशांतकुमार सुशांतकुमार देबनार जखमी झाला असून त्याच्यावर रूग्णालयात उपचार सुुरु आहेत. जोनिंग मूळच्या आसामच्या आहेत. त्यांचे वडगाव शेरीत ए टू झेड हे टेलरिंग दुकान आहे. जोनिंग महिलांचे कपडे शिवत असत. तसेच दुकानासमोर त्या भाजीपाला विक्री करायच्या. चार महिन्यांपूर्वी नाथसागर त्यांच्या दुकानात कामाला आला. मात्र, तो व्यवस्थित काम करत नसल्याने आठवड्यापूर्वी जोनिंग यांनी त्याला कामावरुन कमी केले होते.
