Pune Airport – विंग्स इंडिया २०२६ या नागरी विमान वाहतूक परिषदेत पुणे विमानतळ बेस्ट एअरपोर्ट पुरस्काराने सन्मानित करण्यात आले. नागरी विमान वाहतूक मंत्रालय, भारतीय विमानतळ प्राधिकरण आणि फेडरेशन ऑफ इंडियन चेंबर्स ऑफ कॉमर्स अँड इंडस्ट्री यांच्या संयुक्त विद्यमाने हैदराबाद येथे आयोजित भारतातील प्रमुख नागरी विमान वाहतूक कार्यक्रमात हा पुरस्कार प्रदान करण्यात आला. पुणे विमानतळाचे संचालक संतोष ढोके यांनी हा पुरस्कार स्वीकारला. वाढत्या प्रवासी संख्येच्या पार्श्वभूमीवर कार्यक्षम संचालन, मजबूत सुरक्षा मानके, प्रवासी सुविधा सुधारणा आणि उच्च दर्जाची सेवा प्रदान करण्यासाठी पुणे विमानतळाने सातत्याने केलेल्या प्रयत्नांची ही दखल आहे. संचालनातील विश्वासार्हता आणि प्रवासी सुलभता राखण्यात विमानतळाने उच्च मानके कायम ठेवली असून, १०-२५ एमपीपीए श्रेणीत देशातील आघाडीच्या विमानतळांपैकी एक म्हणून आपले स्थान बळकट केले आहे. याबाबत अभिनंद करताना मुरलीधर मोहोळ म्हणाले, पुणे विमानतळाचा गौरव अभिमानस्पद आहे. हा प्रतिष्ठेचा सन्मान एएआय अधिकारी, विमान कंपन्या, सुरक्षा यंत्रणा आणि ग्राउंड हँडलिंग कर्मचारी अशा संपूर्ण विमानतळ समुदायाच्या समर्पण, व्यावसायिकता आणि संघभावनेचे द्योतक आहे. पुणे हे उद्योग, शिक्षण आणि नवोपक्रमाचे महत्त्वाचे केंद्र म्हणून उदयास येत असताना, विमानतळाची भूमिका कनेक्टिव्हिटी मजबूत करण्यात आणि आर्थिक विकासाला चालना देण्यात अत्यंत महत्त्वाची आहे.
