Shirur News : पुणे-अहिल्यानगर राष्ट्रीय महामार्गावरील धोकादायक परिस्थिती आणि अपुऱ्या रस्ता सुरक्षा उपाययोजनांविरोधात १३ दिवस लोकशाही मार्गाने आंदोलन करणारे सामाजिक कार्यकर्ते निलेश यशवंत वाळुंज यांना न्यायालयीन दिलासा मिळाला आहे. (Shirur News)

आंदोलनकर्त्यांना कायदेशीर मदत करत घोडनदी बार असोसिएशनचे माजी अध्यक्ष अॅड. उदय सरोदे, अॅड. अभिषेक बाफना व त्यांच्या सहकाऱ्यांनी निःस्वार्थ सहकार्य केले. अतिरिक्त सत्र न्यायालयाने अंतरिम जामीन कायम ठेवल्याने आंदोलनकर्त्यांना मोठा दिलासा मिळाला आहे. (Shirur News)

राष्ट्रीय महामार्ग क्रमांक ७५३-F वरील अपघातप्रवण परिस्थिती दूर करून नागरिकांना सुरक्षित प्रवासाची हमी मिळावी, या मागणीसाठी वाळुंज यांनी १८ ऑक्टोबरपासून शिरूर येथे आंदोलन सुरू केले होते. मात्र, आंदोलनानंतर त्यांच्यासह इतर आंदोलनकर्त्यांवर गुन्हे दाखल झाल्याने परिसरात चर्चा सुरू झाली. (Shirur News)

या न्यायालयीन लढ्यात अॅड. सरोदे, अॅड. बाफना व त्यांच्या सहकाऱ्यांनी कोणताही मोबदला न घेता कायदेशीर मार्गदर्शन केले. ज्येष्ठ समाजसेवक अण्णा हजारे यांनीही त्यांच्या सहकार्याचे कौतुक केल्याचे वाळुंज यांनी सांगितले. (Shirur News)

अॅड. सरोदे यांनी शांततामय आंदोलन हा नागरिकांचा घटनात्मक अधिकार असल्याचे स्पष्ट केले. न्यायालयाने अंतरिम जामीन कायम केला असून, पुढील प्रक्रिया न्यायालयीन चौकटीत सुरू राहणार असल्याचे त्यांनी सांगितले. (Shirur News)

दरम्यान, नागरिकांच्या जीवितसुरक्षेसाठी सुरू केलेला लढा थांबणार नसल्याचा निर्धार वाळुंज यांनी व्यक्त केला. महामार्गावरील सुरक्षा उपाययोजना तातडीने राबविण्याची मागणी त्यांनी पुन्हा केली आहे. (Shirur News)

लोकशाही मार्गाने जनहिताचा प्रश्न उपस्थित करणाऱ्या आंदोलनकर्त्यांना कायदेतज्ज्ञांनी दिलेली साथ आणि न्यायालयीन दिलासा यामुळे शिरूर तालुक्यात सामाजिक बांधिलकी व नागरिकांच्या सुरक्षिततेचा मुद्दा पुन्हा चर्चेत आला आहे. (Shirur News)