Pune accident news : गेल्या वर्षी पुण्यातील कल्याणीगर भागात एका भरधाव पोर्शे कारने संगणक अभियंता तरुण-तरुणीला धडक दिल्याची घटना घडली होती. या अपघातात दोघांचाही मृत्यू झाला होता. या घटनेनंतर आता पानशेत ते पुणे रस्त्यावर मनेरवाडी येथे एका भरधाव वेगाने आलेल्या फॉर्च्युनर कारने राँग साईडने येत दिलेल्या धडकेत दुचाकीस्वाराचा मृत्यू झाल्याची घटना घडली आहे.

या अपघाताच्या घटनेत मृत्यूमुखी पडलेल्याचे नाव अनिकेत अरुण भालेराव (३५, रा. वरदाडे, ता. हवेली, जि. पुणे) असे असून ते पेशाने वकील होते. ही घटना बुधवारी १४ मे रोजी संध्याकाळी साडेपाच वाजण्याच्या सुमारास घडली आहे. दरम्यान, दुचाकीस्वाराला उडवल्यानंतर फॉर्च्युनरमधील चालक आणि एक युवती हे घटनास्थळावरून पसार झाले. याप्रकरणी मयत अनिकेत अरुण भालेराव यांचे काका शांताराम गोपाळ भालेराव (वय ५२) यांनी हवेली पोलिस ठाण्यात फिर्याद दिली आहे.

या प्रकरणी हवेली पोलिसांनी फॉर्च्युनर (एमएच १४ ई ए ००५१) च्या चालकाविरोधात गुन्हा दाखल केला आहे. शांताराम भालेराव यांनी दिलेल्या फिर्यादीनुसार, अनिकेत भालेराव हे शिवाजीनगर न्यायालयात वकिली करत होते. बुधवारी संध्याकाळी चारच्या सुमारास ते भाजीपाला आणण्यासाठी खानापूर येथे गेले होते.

पानशेत ते पुणे रस्त्यावरील तारांगण हॉटेलसमोरून जात असताना समोरून आलेल्या फॉर्च्युनरने त्यांना जोराची धडक दिली. या अपघातात अनिकेत गंभीर जखमी झाले होते. त्यांना जखमी अवस्थेत खानापूर येथील प्राथमिक आरोग्य केंद्रात नेण्यात आले. त्यानंतर डॅाक्टराच्या सल्ल्यानुसार शहरातील एका खाजगी रुग्णालयात नेण्यात आले. तिथे गेल्यावर डॅाक्टारांनी अनिकेत याला मृत घोषित केले.

दरम्यान, प्रत्यक्षदर्शी आणि अनिकेत यांच्या नातेवाईकांनी बोलताना फॉर्च्युनर कारचा चालक राज चोरघे नामक व्यक्ती असल्याची माहिती दिली आहे. तसेच अपघातावेळी तो मंद्यधुंद अवस्थेत असल्याचा दावा नातेवाईकांनी केला आहे. तसेच कल्याणीनगर भागातील अपघात प्रकरणात पोलिसांनी ज्या प्रकारे कारवाई केली. तशीच कारवाई या अपघात प्रकरणात करण्यात यावी, अशी मागणी मयत अनिकेत भालेराव यांच्या नातेवाईकांकडून करण्यात आली आहे. या अपघाता प्रकरणाचा पुढील तपास पोलीस करत आहेत.