नसरापूर : कापूरहोळ चौक येथे आज रविवारी (दि. २३) रास्ता रोको आंदोलन करण्यात येणार असल्याने पुणे-सातारा राष्ट्रीय महामार्गावरील वाहतूक सुरक्षेच्या दृष्टीने बंद करून पर्यायी मार्गाने वळविण्याचे आदेश जिल्हाधिकारी तथा जिल्हादंडाधिकारी जितेंद्र डुडी यांनी दिले आहेत.

पोलीस अधीक्षक, पुणे ग्रामीण यांच्या अहवालानुसार भोंगवली (ता. भोर) येथील प्रस्तावित जी. एस. प्रकल्पाच्या कामासंदर्भात तसेच संबंधित प्रश्नांवरून कापूरहोळ चौक येथे रास्ता रोको आंदोलन करण्यात येणार आहे. या आंदोलनासाठी मोठ्या संख्येने शेतकरी, बैलगाड्या, ट्रॅक्टर व इतर वाहने उपस्थित राहण्याची शक्यता प्रशासनाने व्यक्त केली आहे.

रविवार असल्याने तसेच श्रावण महिना सुरू असल्यामुळे पुणे-सातारा राष्ट्रीय महामार्गावर पर्यटक व भाविकांच्या वाहनांची मोठ्या प्रमाणावर वर्दळ असते. कापूरहोळ चौकातून सासवड-जेजुरी, मोरगाव, नारायणपूर तसेच इतर धार्मिक व पर्यटनस्थळांकडे मोठ्या प्रमाणात वाहतूक होत असते. त्यामुळे कापूरहोळ चौकात मोठ्या संख्येने बैलगाड्या, ट्रॅक्टर व इतर वाहने उभी राहिल्यास महामार्गावरील प्रवासी व मालवाहतूक वाहनांच्या मोठ्या रांगा लागू शकतात. परिणामी वाहतूक कोंडी होऊन कायदा व सुव्यवस्थेचा गंभीर प्रश्न निर्माण होण्याची शक्यता लक्षात घेऊन प्रशासनाने वाहतूक वळविण्याचा निर्णय घेतला आहे.

सकाळी ८ वाजल्यापासून वाहतूक बंद

जिल्हाधिकारी तथा जिल्हादंडाधिकारी यांनी मोटार वाहन कायदा, १९८८ मधील कलम ११५ तसेच शासन गृह विभागाच्या दि. ११ मे १९९० रोजीच्या अधिसूचनेनुसार प्राप्त अधिकारांचा वापर करून दि. २३ ऑगस्ट सकाळी ८ वाजल्यापासून रास्ता रोको आंदोलन संपेपर्यंत पुणे-सातारा आणि सातारा-पुणे या मार्गावरील वाहतूक बंद करण्याचे आदेश दिले आहेत.

वाहतूक पर्यायी मार्गाने वळविण्यात येणार

पुणे-सातारा जाणारी सर्व प्रकारची वाहतूक पूर्णपणे बंद करून नऱ्हे-कात्रज-कांबळा खडी मशीन-सासवड-जेजुरी-निरा मार्गे सातारा या पर्यायी मार्गाने वळविण्यात येणार आहे. सातारा-पुणे जाणारी सर्व प्रकारची वाहतूक पूर्णपणे बंद करून शिरवळ येथील पंढरपूर फाटा-लोणंद-निरा-जेजुरी-सासवड मार्गे पुणे या पर्यायी मार्गाने वाहतूक वळविण्यात येणार आहे. सासवड ते कापूरहोळ येणारी सर्व प्रकारची वाहतूक पूर्णपणे बंद करून सासवड-जेजुरी-लोणंद मार्गे वाहतूक वळविण्यात येणार आहे. पुणे-वेल्हा मार्गावरील सर्व प्रकारची वाहतूक पूर्णपणे बंद करून सदरची वाहतूक कात्रज-कुसगाव मार्गे वांगी-आंबेगाव मार्गे वेल्हा अशी वळविण्यात येणार असल्याचे आदेशात नमूद करण्यात आले आहे.